BAUKAU, STLTIMORLESTE.com – Iha primeiru trimestral tinan nee, Servisu Munisipal Saude Baukau rejistu kazu dengue hamutuk 215.
Tuir nota informativu neebe STL asesu husi data Munisipal, Baukau atual iha kazu dengue akumulativu 215, taxa fatalidade 1,4% ho total mate nain 3 neebe maioria akontese ba labarik sira.
Husi numeru akumulativu refere klasifikasaun kazu leve nain 128, moderadu 84 no severa 3 neebe afetadu liu ba idade 5-14 rejistu nain 103 no mate nain 2 no idade 0-4 nain 80 neebe mos hetan afetadu ba kazu moras dengue.
Kazu dengue hirak nee, Servisu Munisipal Saude Baukau rejistu iha Postu Administrativu Baguia, Kelikai, Laga, Vemasi, Venilale aas liu mak iha Postu Administrativu Baukau Vila iha kazu dengue 121.
Dengue refere iha Servisu Munisipal Saude Baukau anota, kauza husi transmisaun ambiente neebe labarik sira halimar ba, hanesan fatin eskola no bairo laran.
Tanba nee Xefe Departementu Programa Saude Munisipiu Baukau, Maria Candida dos Reis konsidera, kazu moras dengue tinan nee iha Munisipiu Baukau atinji numeru neebe aas kompara ho tinan 2025, tanba nee Servisu Munisipal Saude Baukau inisia enkontru ho Xefe Aldeia, Delegadu no Delegada inklui GSI no PSF atu hamutuk ho Servisu Munisipal halo prevensaun ba kazu dengue refere iha Munisipiu Baukau.
“Moras dengue nee Baukau Vila mak barak demais liu liu iha Tirilolo, Kaibada, Wailili, Vemasi, Laga, Venilale, Kelikai no Baguai mos, iha Sentru Saude hirak nee oituan maibe barak demais mak iha Baukau vila tuir tan mak Venilale no Vemasi, entaun iha Baukau laran nee mak ami husu sira mai partisipa informasaun ida nee bele hatene fahe informasaun ba vizinhu sira,” hateten Xefe Departementu Programa Saude Munisipiu Baukau, Maria Candida dos Reis iha sesaun enkontru ba estrutura Suku 13 iha Postu Administrativu Baukau Vila, inklui GSI no PSF sira iha salaun enkontru Servisu Munisipal Saude Tirilolo, Tersa (31/03/2026).
Iha fatin hanesan Koordenador Grupu Suporta Inan (GSI) husi Suku Kaibada Makasae, Manuel Guterres Freitas preokupa ho surtu dengue iha Munisipiu Baukau, neebe daudaun atinji ona ona liu 200, maibe liu husi enkontru refere bele aumenta konhesementu no sei intrudus ba komunidade sira halo prevensaun ba kazu dengue iha nivel Suku.
“Ami tuir treinamentu ida nee ami sei hatoo ba Konselhu Suku hodi avizu ba komunidade sira preve dengue, bainhira ami hetan ami sei rekomenda mai sentru saude para halo tratamentu ba moras dengue nee,” katak Manuel Guterres Freitas.
Entretantu partisipa iha enkontru nee kompostu husi Delegadu, Delegada ekipa GSI no PSF husi Suku 13 neebe pertense ba Postu Administrativu Baukau Vila.
(tom)
