DILI, STLTIMORLESTE.com – Komandante Jerál Polísia Nasional Timor Leste (PNTL), Komisáriu Asisténte Polísia Afonso dos Santos husu ba membru Unidade Polisia Máritima (UPM) atu servisu ho dignidade.
“Imi servisu ho dignidade, servisu ho orden responsabilidade Komando. Hau hakarak imi servisu hamutuk ho F-FDTL liu-liu Komponente Navál,” Komandante Jerál PNTL, Komisáriu Asisténte Polísia Afonso dos Santos ba jornalista sira hafoin vizita Unidade Polisia Máritima (UPM) iha Seonál Lesidere, Tersa (31/03/2026).
Nia husu ba UPM labele envolve iha atividade ilísitu, tanba iha atividade ilísitu neebe ema hatama sasán husi tasi Indonézia mai tasi Timor tuir informasaun neebe iha katak Polísia Eskuadra sira mak envolve.
“Maibé hau la rona membru Polísia Martima envolve iha laran, hau apresia ho mota boot sira, tanba nee husu atu ita boot sira mantein ida nee, hau husu ba membru tomak servisu nafatin, hanesan komandante jeral sei haree buat neebe imi presiza,” nia deklara.
Nia fundamenta katak, durante mandatu hanesan Komandante Jerál nia sei fo prioridade ba unidade tolu, Unidade Espesiál Polísia, Unidade Polisia Máritima no Unidade Patrullamentu Fronteira.
“Iha hau nia mandatu hau sei haree liu ba UEP, UPM no UPF, hau hakarak unidade tolu avansa no dezenvolve iha hau nia mandatu, tanba unidade tolu importante, tanba iha situasaun neebe la diak unidade tolu ne’e mak sei halo intervensaun,” nia deklara.
Komisáriu Afonso mos kompromete katak durante nia mandatu sei tau matan ba ekipamentu no rekursu iha Unidade Polisia.
“Hau nia hanoin mak nee, hau sei kaer PNTL unidade tolu tenke avansa, nee ita iha rekrutamentu no rekrutamentu nee sei tau joven sira para futuru nee bein formadu. Hau husu ba membru tomak servisu nafatin, hanesan komandante jerál sei haree buat neebe imi presiza,” nia deklara.
Iha biban nee Komandante Jerál PNTL, Komisáriu Asisténte Polísia Afonso dos Santos mos husu ba membru Unidade Polisia Máritima labele tula liman ba populasaun, kuandu iha problema ho populasaun bolu no rezolve didiak.
“Hau lakohi imi nia liman kona populasaun, ida nee hau lakohi, polísia iha atu proteje nia komunidade no nia povu”, nia fó hanoin.
Iha fatin hanesan Komandante Unidade Polisia Máritima (UPM), Superentente Xefe Eugénio Pereira informa, vizita Komandante Jerál PNTL nee atu haree kestaun estratéjia no situasaun UPM nian.
“Ho vizita nee Komandante Jerál foti nia responsabilidade hanesan Komandante Jerál bele buka solusaun ba difikuldade no dezafiu neebe Unidade Polisia Máritima iha,” dehan nia.
Nia informa, problema neebe mak durante nee UPM iha mak infraestrutura hanesan ba operasaun, tanba tuir lei orgánika PNTL nia UPM sei iha batalhaun ida neebe mak sei halo servisu ba operasaun sira iha tasi. Tanba nee presiza kria infraestrutura ba ida nee, nune’e ba oin Unidade Polisia Máritima bele halo servisu ho diak liu tan.
Nia koalia, Timor Leste nuudar País isolár neebe iha ninian Estadu konsteira tanba presiza haree kolokasaun unidade Polisia Máritima iha area konsteira.
Tanba Unidade Polisia Máritima ninian prezensa iha área konsteira iha zona Máritima nee aumezmu nia aprezenta mos estadu. Hanesan pilar ida neebe ke reprezenta Estadu hodi haree konaba neebe kaben ba soberania Estadu ida nee.
Komandante Eugénio deklara, kolokasaun rekusu seidauk sufisiente maibe kona-ba fasilidade transporte martima daudaun nee sufisiente.
“Ita iha roo Lucitania neebe hahu halo operasaun, no ita mos iha roo sira seluk entantunita buka para depois melhora tan,” nia afirma.
(jen)
