DILI, STLTIMORLESTE.com – Loron ikus atu husik Timor Leste (TL), Embaixador Indonezia ba TL, Okto Dorinus Manik ho nia espoza, Flantina Sari Mutiara Silalahi halao almosu no enkontru ho jornalista sira husi media estatal no media privadu sira.
Eventu neebé halao iha Rezidénsia Embaixadór Indonézia nian iha Tasi-ibun Pantai Kelapa, Dili, Tersa (31/3/2026) nuudar sinál apresiasaun ba kolaborasaun neebé estabelese ona entre Embaixada Indonézia iha Dili ho mídia sira iha TL durante mandatu Embaixadór Okto Dorinus Manik nian tinan 4 fulan hat (4).
Iha ambiente neebé manas no amigavel, Embaixadór Okto Manik akompaña husi nia espoza, Flantina Sari Mutiara Silalahi no pesoál Embaixada Indonézia, simu reprezentante sira husi mídia nasionál oioin, inklui STL (Suara Timor Lorosae), Timor Post, TATOLI, RTTL (Radio e Televisão de Timor-Leste), GMN (Grupo Média Nacionál), Independente, Radio Voz, HATUTAN, no seluk tan.
Iha biban nee, Embaixadór Okto Dorinus Manik hatoo mensajen importante ba imprensa kona-ba dezafiu neebé mídia hasoru iha era dezenvolvimentu teknolójiku neebé lalais ba beibeik.
Nia subliña katak velosidade divulgasaun informasaun atuál tenke iha balansu ho abilidade atu disamina lia-loos hosi informasaun.
Diplomata senior Indonezia nee dehan, teknolojia mídia nian dezenvolve makaas tebes. Informasaun sira bele espalla iha segundu balun nia laran, maski liuhosi plataforma sira hanesan Facebook no YouTube. Tanba nee, tenke kuidadu, tanba laós informasaun hotu neebé sirkula hanesan loos.
Nia alerta katak proliferasaun konteúdu hosi mídia laós ofisiál sira, inklui liuhosi plataforma dijitál sira, iha potensiál hodi hamosu dezinformasaun. Tanba nee, jornalista sira presiza hadia sira-nia abilidade verifikasaun no mantein notísia nia ezatidaun.
Nia hatete katak avansu teknolójiku sira, inklui intelijénsia artifisiál (IA), mós aprezenta dezafiu foun sira tanba sira bele esplora hodi manipula informasaun ho konvinsente.
“Agora ema bele kria konteúdu ho teknolojia neebé hanesan tebes ho orijinál. Ida-nee hanesan dezafiu ida ba mídia sira hodi hadia liután sira nia koñesimentu, velosidade, no ezatidaun”, dehan Embaixador Okto Manik.
Embaixadór Okto Manik mós subliña papél estratéjiku mídia nian hodi fó apoiu ba dezenvolvimentu nasaun ida nian. Nia hein katak mídia iha TL kontinua fó kontribuisaun pozitivu no la estraga orden sosiál.
“Mídia sira tenki halo parte iha dezenvolvimentu. Ita labele husik média sira sai destrutivu. Ita hotu iha kompromisu hodi harii Timor-Leste ida neebé avansadu liu”, hatete Embaixador Okto Manik.
Iha oportunidade ida nee, Embaixador Okto Manik hatoo ninia mensajen ba jornalista sira katak importánsia kapasitasaun, tantu iha aspetu tékniku hanesan fotografia no videografia, no mós iha abilidade reportajen neebé lalais.
Nia mós fó hanoin ba mídia sira atu labele monu ba lasu prátika reportajen nian neebé depende deit ba títulu sensasionál sira lahó apoiu konteúdu ho kualidade.
“Konteúdu tenki ekilibradu. Labele iha deit títulu bombastiku sira lahó konteúdu neebé fó apoiu. Mídia tenki mantén profisional no mantén kualidade”, nia subliña.
Konklui enkontru nee, Embaixadór Okto Manik hatoo nia apresiasaun ba mídia nia apoiu durante halao knaar iha Timor-Leste, no hatoo nia esperansa katak relasaun diak nee sei kontinua iha futuru.
Embaixador Okto Manik ho nia espoza, Flantina Sari Mutiara Silalahi, Kuarta (1/4/2026) fila fali ba Indonezia ho aviaun Aero Dili.
“Ami mai ho aviaun Sriwijaya no fila ho aviaun Aero Dili. Adeus Timor Leste no Obrigado barak,” dehan Espoza Embaixador, Flantina Silalahi.
Nia mos dehan, husi Residensia Embaixador Indonezia nian, sira sae kareta privadu Prezidente Republika, Jose Ramos Horta ba Aeroportu Internasional Prezidente Nicolau Lobato, Komoro, Dili. Depois Embaixador Okto Manik ho nia espoza voo ho aviaun Aero Dili ba Bali, Denpasar, Indonezia.
(mik)
