DILI, STLTIMORLESTE.com – Tuir Previzaun meteorolojika husi Diresaun Nasional Meteorolojika Geofisika (DNMG) katak, durante loron 3 tuir mai (07 too 09 Abril 2026) preve : udan ho intensidade moderadu too forte, ho akumulasaun boot liu (>10 mm/loron) kuaze iha teritoriu nasional.
Tuir informasaun neebe STL asesu husi pajina ofisial DMNG, Tersa (07/04/2026) katak, Timor Leste agora dadaun iha hela faze tranzisaun husi períodu udan ba períodu bailoron, katak akontese ona mudansa diresaun anin iha nível 850 hPa too Superfície entre parte noroeste-susudeste (monsaun) inklui mudansa zona konvergensia sira. Kondisaun hirak nee sei aumenta instabilidade atmosferika iha área Timor Leste durante faze nee.
Tuir Previzaun Meteorolojika durante loron 3 tuir mai (07–09 Abril 2026), preve: udan ho intensidade moderadu too forte, ho akumulasaun boot liu (>10 mm/loron) kuaze iha teritoriu nasional. Atividade konvektiva aas, posibilidade trovoada.
Distribuisaun udan been la uniforme, maibe forte iha area montanhoza no zona vulneravel.
Iha nivel alerta (udan forte- bá forte liu): Bobonaro, Ermera, Likisa no Aileu.
Atensaun Espesial bá Munisípiu seluk sira inklui Dili, Baucau, Covalima, Manatuto, Viqueque, Lautem no RAEOA
Impaktu Potensial bá kondisaun hirak nee bele hamosu inundasaun lokal, bee sae lalais no mota tun. Rai monu iha area foho sira no estrada kritiku/kotu. Bee sae (flash flood) iha zona baixu no urbanu. Interrupsaun transporte no infraestrutura.
Rekomendasaun bá autoridade lokal no APC presiza halo monitorizasaun kontinua ba area risku sira. Komunidade iha zona vulneravel tenke aumenta vigilánsia no preparasaun. Evita atividade iha mota-ninin.
Nafatin tuir deit informasaun ofisial no atualizasaun husi MTC–DNMG.
Entretantu udan been neebe ohin tun makas iha lokraik tuku 14:00 otl, halo be nalihun iha estrada sira, no be tama bá komunidade balun nia uma iha area Tasitolu, bairu BTN 3. Situasaun nee sempre akontese bainhira udan tau makas bá rai, maske la too oras ida nia laran maibe bee nalihun no sae lalais deit iha estrada laran.
(dom)
