DILI, STLTIMORLESTE.com – Komandante Jerál Polísia Nasionál Timor Leste (PNTL), Komisáriu Asisténte Afonso dos Santos oferese area estrátejika lima importante nuudar mata dalan ba membru polísia sira atu servisu tuir, hodi melhora di’ak liu tan servisu institusaun PNTL.
“Ita nia misaun hanesan membru Polisia Nasional mak atu garante ordem públika, proteje vida no propriedade sidadaun sira, no asegura katak lei no regulamentu sira implementa ho lo-loos no justu..Tanba nee, iha oportunidade ida nee, hau hakarak fo énfase liu tan ba area estratejika lima neebe tenke sai hanesan prioridade prinsipál iha ita nia servisu loron-loron. Primeiru, Polisiamentu Komunitaria. Abordajen ida nee importante tebes atu harii relasaun neebe forte entre polisia no komunidade,” hatete Komandante Jerál Polísia Nasionál Timor Leste (PNTL), Komisáriu Asisténte Afonso dos Santos iha nia intervensaun, bainhira prezide parada jerál fulan Abríl iha Kuartel Komando Jerál PNTL Kaikoli, Tersa (07/04/2026).
Nia dehan, nuudar polísia tenke sai hanesan parseiru ba povu, labele deit hanesan forsa neebe atua bainhira problema mosu. Komunikasaun efetivu no kolaborasaun diak.
“Ita bele halo prevensaun krime ho maneira neebe efisiente no sustentavsl,” nia tenik
Komisáriu esplika, estrátéjiku daruak mak investigasaun Kriminál. Servisu investigasaun tenke halo ho padraun profisional neebe aas, respeita prinsipiu legalidade, objetividade no transparensia. Kada kazu tenke trata ho seriedade, bazeia ba evidensía no prosedimentu neebe loos, atu asegura katak justisa bele hetan no konfiansa públiku bele aumenta.
Nia informa, estratéjika datoluk mak kontrolu Tráfiku Rodoviaria. Seguransa iha estrada mak parte importante ida husi seguransa públika.
“Tan nee, ita tenke hasae disipliña iha kontrolu tráfiku, implementa lei ho rigor no edukasaun ba sidadaun sira atu prevene asidente no salva vida ema barak,” nia deklara.
Estratéjika dahaat mak Komisáriu Asisténte Polísia Afonso husu melhora intelijénsia Polisiál. Informasaun mak sai hanesan baze importante ba desizaun operasionál. “Ita tenke reforsa kapasidade intelijensia atu deteta ameasa sira ho sedu, prevene krime no garante estabilidade sosial no seguransa nasional. Servisu ida nee presiza halo ho profisionalizmu, sigilu no responsabilidade aas,”.nia hatete.
Nia koalia, estratéjika lima mak patrulha polisiál. Prezensa polísia iha terenu iha tempu hotu mak fator importante ida atu prevene krime no fo sentimentu seguransa ba komunidade.
“Patrulha tenke halo ho planeamentu diak, regularidade no prontidaun atu responde ba situasaun ruma neebe mosu,” nia hatutan.
Komisáriu Afonso argumenta, atu hametin área estratéjika sira nee sei la bele realiza, se la iha valór fundamentál sira iha ita nia aan. Tan nee, hakarak subliña fila fali importansia husi profisionalizmu, atu halo servisu ho kompeténsia, étika no integridade aas, disipliña, atu tuir regra, norma ho rigor no konsisténsia lealdade, atu fiel ba instituisaun, lideransa no nasaun no responsabilidade, atu prontu simu konsekuensia ba kada asaun no desizaun neebe halo.
“Ita hotu tenke komprende katak, hanesan membru Polisia Nasional Timor Leste laos deit hanesan profisáun ida, maibe mos vokasaun ida atu servisu ba povu no nasaun ho dedikasaun tomak. Konfiansa publiku ba instituisaun nee depende ba ita nia atitude, integridade no maneira servisu loron-loron,” nia afirma.
(jen)
