DILI, STLTIMORLESTE.com – Portavós Polisia Nasionál Timor Leste (PNTL), Superintendente Xefe Polísia João Belo dos Reis hateten, deskonfia membru FALINTIL – Forsa Defeza Timor Leste (F-FDTL) ho oknum PNTL envolve kazu ilísitu iha fronteira hodi hatama motor RX-King ida mai tama iha Dili.
Nia dehan, kazu nee akontese iha loron Sesta (03/4) foin lalais nee, maizumenus oras tuku 16:00, ekipa konjunta husu informsaun polísia nian husi Servisu Nasionál Intelejensia (SNI) no forsa nian konsge deteta movimentu transporte balun neebe transporta sasan kontra bandu mai husi fronteira tama kapitál Dili, nunee ekipa duni tuir no konsege deteta katak ita nia maluk soldadu husi institusaun F-FDTL balun neebe fasilita hela tranzasaun halo atividade kontra bandu ida nee.
“Membru PNTL neebe envove iha atividade nee mak ho inisiál SP no membru forsa armada Komponente Navál mak ho inisial ED, ita asegura kedan iha tempu neeba, ho sasán evidensia halo ona prosesu ho numeru NUC 0117/2026-PNSIK neebe aprezenta ona ba Ministeriu Públiku,” hatete Portavós Polisia Nasionál Timor Leste(PNTL), Superintendente Xefe Polísia João Belo dos Reis ba jornalista sira liu husi konferensi imprensa iha KomJer, Tersa (07/04/2026).
Nia relata katak, iha informasaun neebe polísia rekolha katak membru PNTL husi Unidade Polisia Martima envolve direta prosesu nee.
“Depois de ita loke tiha investigasaun, ita deteta katak sira nain rua nee iha relasaun familia no nia kolega foti nia kareta ba uza nee nia la informa ba, laiha konhesimentu ba nia, depois bainhira kareta nee ba too fronteria, nia nain la hatene polisia halo tiha aprensaun mak nia foin hatene,” nia esplika.
Komandante João informa, kareta nee tula deit motor ida mak RX-King no kareta no motor aprezenta ona ba Ministeriu Públiku, sasán sira nee kategória kontra bandu.
Nia deklara, sasan sira nee membru PNTL no forsa armada hatama mai liu husi Palaka Batugade ninian, depois ita nia informasaun sira deteta hapara nia iha fatin neeba, maibe ekipa konjunta husu kareta neebe lori motór nee nia la koopera no ekipa sira duni tuir konsege tama kapital Dili laran depois mak kaer iha Dili.
Nia hatutan, tuir informasaun neebe iha katak iha kareta nee nia laran tua no mos kilat manu (kilat anin), maibe bainhira ekipa konjuta hapara tiha kareta, maibé kareta nee tula motorizada deit laiha sasan seluk iha laran, kuandu iha sasan seluk sei halo investigsaun.
“Investigasaun sei lao hela, buka tuir sasan sira neebe mak ita deskonfia sira bele asegura nafatin,” nia realsa.
Nia dehan, kazu nee PNTL konsidra nuudar fraglante delitu, tanba bainhira membru PNTL no F-FDTL tula motor ba kareta iha area Palaka, ekipa konjunta deteta kedan no husu atu koopera maibé kondutór mak la koopera.
Nia informa, kazu nee konsidera fraglante delito tanba bainhira nia tama mai, duni tuir too fatin iha Dili depois mak sira kaer no nia foti sira.
“Daudaun ita halo hela investigsaun ba membru PNTL no membru Komponente Navál. Ita la detein sira tanba ita husu orientsaun ba Ministeriu Públiku, MP orienta ba ita atu halo prosesu normál. Buat hotu-hotu ita halo nee nain ba prosesu tomak Ministeriu Públiku ita ezekuta orientasaun neebe iha,” nia tenik.
Maski nunee, investigasaun ba membru PNTL nee sei kontinua lao hela tanba prosesu krime nee nafatin ba oin.
“Membru PNTL halo ninian atividade, depois ita haree mos kualker tempu karik iha evidensia relasaun ba nia envolvimentu ita sei bolu fali nia mai,” nia dehan.
Iha biban nee Portavós PNTL nee dehan, atu prevene atividade ilísitu iha fonteira, Komandante Jeral fo atensaun ba iha Komandu UPF, UPM no servisu intelejensia sira atu halo servisu neebe diak liu hodi foku iha área fronteira hodi halo prevensaun ba ilisitus kontra bandu neebe akontese iha linha fronteira.
“Maibe polisia rasik halo servisu iha limitasaun, maibe ita presiza nafatin kontribuisaun ho autoridade neebe iha fronteira, ministeriu interligadu neebe mak halo nia knaar iha linha fronteira ita halo prevensaun ba kazu ilístus, scaming iha linha fronteira,” nia afirma.
(jen)
