AMBENO, STLTIMORLESTE.com – Autoridade Protesaun Civil (APC) iha Rejiaun Administrativa Espesial Oecusse – Ambeno (RAEOA) hahu husi fulan Janeiru too fin de Marsu 2026, konsege rejistu vitima dezastre naturais hanesan rai halai, inundasaun, uma monu no seluk-seluk tan.
Informasaun nee hatoo husi Komandante Autoridade Protesaun Civil (APC) RAEOA, João da Silva Sila ba STL liu husi telefone, Tersa nee (07/04/2026).
Nia dehan, daudaun Autoridade Protesaun Civil RAEOA rejista ona kazu dezastre hamutuk 210 ho tipu dezastre neebe diferente dezde janeiru ate a data.
“Ita husi APC-RAEOA, rejistu ona kazu dezastre hamutuk 210 ho tipu dezastre neebe diferente dezde fulan Janeiru ate data ohin 07 Abril 2026. Hau hakarak informa katak husi kazu dezastre neebe maka mensiona, responde ona ho pakote emerjensia,” dehan nia.
Nia haktuir tan katak, kona-ba kazu dezastre neebe komunidade sofre ho grave nomos natoon, Autoridade Protesaun Sivil RAEOA sei foti hela dadus no ate agora seidauk iha data fiksu, atu nunee identifika katak uma hira mak sei hetan rekupera tanba parte Diresaun Nasional rekoperasaun sei halo asesmentu no foti dadus, tanba nee wainhira dadus fiksu ona mak sei relata ba publiku.
“Hau nuudar komandante Autoridade Protesaun Civil RAEOA hakarak apela ba komunidade sira hotu katak, atual ita sei hasoru risku dezastre naturais, liga ho mudansa klimatiku husi udan no anin sei makaas, tanba nee husu nafatin ba ita nia komunidade sira atu hadook aan husi fatin sira neebe risku dezastre naturais, hanesan aihun boot, mota ninin, tasi ibun sira no foho lolon, ita labele hela besik neeba tanba ida nee sei fo risku ba ita nia vida moris, tanba nee tenke hadook aan husi fatin hirak nee atu kuidadu ita nia aan, ita nia familia nomos ita nia riku soin,” dehan nia.
Antes nee Jose Tanesib Anuno nuudar Diretor Rejional Administrasaun reprezenta Prezidente Autoridade RAEOA, iha ambitu oferese apoiu emerjensia liu husi ekipa konjuntu, kompostu husi Autoridade RAEOA, APC, Cruz Vermelha, MSSI ho World Foot Programmer iha Bairu Nunhenu, Aldeia Noeninen, Suku Cunha, Postu Administrativu Pantemakassar, husu ba komunidade sira neebe sai ona vitima ba dezastre atu hadook aan husi fatin risku dezastre.
“Ita husu ba komunidade neebe mak sai vitima ona ba dezastre nee atu kontinua hadook aan husi fatin risku sira nee, governu kontinua buka dalan hodi haree fatin risku sira nee atu prevene povu liu husi bronjol ho halo moru protesaun, maibe ida nee sei lori tempu, tanba nee husu nafatin povu atu hadook aan husi fatin risku dezastre iha Oecusse,” dehan nia.
Nunee mos Xefe Suku Bobocase, Tomas Nesi agradese ba ekipa konjuntu husi governu nomos polisia, F-FDTL inklui mos Cruz Vermelha liu husi ninia filial iha Oecusse neebe mak tulun ona ninia komunidade iha Bairu Nuslao, evakua iha Sede Suku no apoiu emerjensia ba komunidade afetadu sira iha Suku Bobocase.
(jos)
