DILI, STLTIMORLESTE.com – Tuir monitorizasaun Polisia Nasional Timor Leste (PNTL) ba seguransa selebrasaun festa paskua tinan 2026, hahu husi misa Kinta feira Santa too misa Domingu Resurreisaun situasaun seguransa iha teritoriu Timor tomak kontroladu.
Informa Portavos Polisia Nasional Timor Leste (PNTL), Superintendente Xefe Polisia João Belo dos Reis ba jornalista sira iha Komando Jeral PNTL Kakoli, Tersa (7/4/2026).
Tuir Portavos PNTL, durante selebrasau pesta paskoa situasaun teritoriu nasional lao iha ambitu hakmatek no kontroladu. “Ita la rejista kazu grave ruma neebe akontese durante periodu selebrasaun paskoa iha ita-nia rai laran,” katak João.
Superintendente Xefe Polisia, João fundamenta, durante periodu tempu paskoa bazeia ba planu operasaun neebe komandu operasaun hasai hodi asegura seguransa rai-laran ezekuta ho diak, tanba kontribuisaun husi sidadaun sira husi nivel aldeia, suku mai too Kapital Dili lao diak teb-tebes tan nee mak la rejistu kazu asidente no insidente ruma, situasaun kontroladu.
Maria Banca dos Santos nuudar komunidade Bairru-Pite dehan, nia sente orgulhu tanba selebrasaun paskua tinan nee, la iha asidente no la iha problema. Nee hatudu katak, maluk sarani sira hotu-hotu espesial ba sarani katolika hotu-hotu iha ona konsiensia tudu ida-idak nia debosaun hodi selebra nain Jesus Kristu nia mate.
“Ita sente orgulhu halao loron paskoa ida nee ho hakmatek, tanba ita hetan seguransa masimu husi PNTL, ita mos hatene katak loron ida nee Jesus mate no moris hias fila-fali, tanba nee ita halao ho fuan neebe kontenti,”katak Maria.
Tuir observasaun STL misa paskua iha Parokia Santo Antonio Motael hahu husi Kinta Feira Santa too misa Sabadu Aleluia situasaun seguransa lao kontroladu. PNTL sempre destaka membru polisia husi Unidade Tranzitu hodi asegura seguransa liu-liu tau atensaun ba karreta-motor neebe sai-tama.
Partisipasaun sarani ba misa kinta feira santa iha Igreja Motael neebe halao iha tuku 5:00 loraik maske hasoru udan boot maibe sarani balun deit maka fila liu-liu ba sarani sira neebe ho nia oan sei kiik, sarani seluk wain ba wain kontinua partisipa misa ho hakmatek too misa hotu foin fila ba uma.
(ger/jen)
