DILI, STLTIMORLESTE.com – Prezidente Republika (PR), Jose Ramos Horta resposta ba artigu husi The Guardian ho títulu Private jets, deserted shores and an unbuilt resort alleged links to sanctioned scam empire revealed in Timor Leste.
Tuir komunikadu neebe STL asesu husi media PR Tersa kalan (07/04/2026) katak, iha loron 6 fulan Abril tinan 2026, Media Internasional The Guardian publika artigu ho títulu Private jets, deserted shores and an unbuilt resort:alleged links to sanctioned scam empire revealed in Timor Leste. Artigu nee temi ema husi rai liur, inklui Senhor ida ho naran Frank Lin.
Prezidente Republika hatete, Frank Lin mak emprezariu ida neebe estabelese nia negosiu iha Hong Kong, Japaun no nasaun sira seluk. Nia negosiu foka liu kona-ba teknolojia informasaun, inklui blockchain, no nia halo ona investimentu sira iha nasaun sira iha Azia nian inklui Japaun.
“Hau simu nia, hanesan hau simu investidor sira mai husi nasaun barak iha Azia no Europa. Sr. Lin hahu mai Timor Leste iha tinan kotuk. Ate agora, nia seidauk halo investimentu ruma iha Timor Leste. Hanesan investidor barak, Sr. Lin mai ho ideia, planu no mehi atu halo investimentu signifikativu iha Timor Leste, maski ida nee seidauk konkretiza. Maibe, Sr. Lin hatene kona-ba hau nia atividade umanitaria sira, neebe buka apoiu loron-loron ba ema kiak sira, família, komunidade no estudante sira. Tanba nee, nia hahu fo apoiu, inklui leptop sira, ekipamentu desportu nian, roupa no doasaun boot ba bolsa estudu. Artigu sira neebe publika la fornese evidensia faktual ruma katak Sr. Lin iha ligasaun ho krime organizadu. Too agora, ita lee deit alegasaun sira, la ho evidensia neebe forte,” dehan PR Horta.
Timor Leste buka atu atrai investidor sira. labele halo alegasaun bazeadu ba ema sira simplesmente tanba sira mai husi Azia, hanesan ema hotu husi nasaun sira Azia nian iha ligasaun ho krime organizadu. Nee maka sala boot ida. Sr. Lin la halo sala ida iha Timor Leste. Governu mak sei deside atu simu investimentu ruma ka lae, no se investimentu nee diak ba Timor Leste, entaun Governu sei deside tuir ida nee.
“Iha tinan hirak nia laran, hau sempre koalia beibeik hodi alerta kona-ba krime organizadu. Iha Timor Leste rasik, Timoroan la metidu iha krime organizadu. Maibe, nuudar nasaun neebe frajil, ita nafatin vulneravel ba ameasa no infiltrasaun husi krime organizadu husi liur. Akontesimentu neebe hetan iha Oecusse iha fulan balun liu ba hasoru ho intervensaun Governu neebe lalais hodi taka hotu kedas. Governu mos taka ona operasaun jogu ilegal sira iha Díli laran. Oras nee daudaun, hau la haree krime organizadu ruma instaladu iha Timor Leste. Sr. Frank Lin la hela iha Timor Leste, nia rezidensia iha Hong Kong no Japaun,” dehan PR Horta.
Xefe Estadu hatete, hamutuk ho Governu no sosiedade tomak nafatin alerta ba perigu sira husi krime organizadu. Maibe prezidente labele simu informasaun neebe mai deit husi relatoriu media nian ka husi ema balun iha Timor Leste, ema sira neebe hakarak aat ba rai nee ka buka atu hafoer Timor Leste nia naran, entaun sira rasik mak halo informasaun falsu kontra ema neebe mak hakarak halo investimentu iha Timor Leste.
“Hanesan hau hatete ona ba jornal nee antes ita tenke sai ema neebe imperdoavel no inflexível kontra krime organizadu. Hau lakon maun alin sira iha luta ba independensia no Timoroan barak mak mate atu nasaun ida nee sai livre. Hau lakohi atu nasaun ida-nee dominadu husi kriminozu sira. Hau sei kontinua simu investidor sira neebe hakarak mai. Hau sei kontinua koalia ho ema hotu. Maibe, karik mosu evidensia ruma neebe konvense hau katak investidor ida halo parte iha krime organizadu, Governu no hau sei trava sira ho firme no laho duvida,” katak PR Horta.
Xefe Estadu hatete, alegasaun sira neebe laiha fundamentu neebe halo laho evidensia hasoru indivíduu ruma sei la simu. Timor Leste nakloke ba investimentu lejítimu no sei kontinua vijilante nafatin.
(eme)
