BAUKAU, STLTIMORLESTE.com – Setor Privadu husu Governu Timor Leste atu provizoriu halakon taxa importasaun hodi hatan ba situasaun difisil neebe ohin loron mundu preokupa.
Diretor kompanhia Manudare Unipessoal Lda, Helio Francisco esplika, kombustivel mak produtu ida neebe hamoris produsaun atividade ekonomia iha rai laran liu husi transportasaun fatin ida ba fatin seluk, maibe daudaun funu iha mediu oriente implika ba presu kombustivel iha territoriu nasional sae makaas, neebe afeta mos ba produsaun atividade ekonomia iha rai laran.
Nunee husu Governu atu provizoriu halakon taxa ba importasaun ba importador sira hodi la implika ba ekonomia iha rai laran.
“Se fo taxa neebe mak livre ba importador sira konserteja sira bele diminui presu tanba Governu ajuda ona iha situasaun nia laran nee mos sai opsaun ida troka halo mate ahi iha 23:00 ba fali iha 05:00 madrugada,” hateten Helio Francisco ba jornalista sira iha Tirilolo Baukau, Tersa (07/04/2026).
Nia konsiente, politika hamate enerjia eletrisidade husi tuku 23:00 kalan too tuku 05:00 madrugada neebe objetivu atu halo poupansa ba kombustivel iha Timor-Leste no asegura stock kombustivel ho orsamentu US$ 168.8 milliaun, nee konsidera politika laloos no desizaun la nesesariu atu halo.
Maibe loloos mak Governu halakon taxa importasaun ba importador sira inklui Pertamina Internasional no Esprensa Timor Oan iha situasaun difisil nia laran nunee la implika liu presu kombustivel iha rai laran no utiliza fali orsamentu montante US$ 168.8 milliaun refere ba prepara kondisoens hodi futuru, bainhira infrenta situasaun hanesan, estadu preparadu ona no sei depedensia ba setor privadu sira iha area importadu kombustivel nian.
“Tan nee hau fo korajem ba Timor GAP tenke seriu ona haree situasaun ida nee katak tinan 2 tolu ba oin tenke Estadu iha rasik ona JTY no Storets volume boot liu swasta sira nee,” Helio rekomenda.
Aleinde mos nia la aseita ho politika halo poupansa ba kombustivel liu husi hamate enerjia eletrisidade hahu husi tuku 23:00 kalan too tuku 05:00 kada loron, tanba atividade ekonomia liu husi faan sasan no sosa sasan laos deit akontese iha tempu loron, maibe akontese mos iha tempu kalan tuir nesesidade komsumidores no kauza seluk mak fo impaktu ba negosiante sira neebe faan sasan importadu sira asegura iha jeleira no frizer.
Nunee Helio Francisco aprezenta, funu iha mediu oriente neebe daudaun implika presu kombustivel ba nasaun sira inklui iha Timor Leste, nuudar materia iha ba Governu atu harii enerjia eletrika turbina husi bee no anin hodi sai fonte energia eletrika neebe garantidu husi Estadu ba nia povu iha situasaun difisil sira.
(tom)
