DILI, STLTIMORLESTE.com – Falta regulamentu neebe klaru hodi proteje setor negosiu retalhu (Tenda Kiik) sai hanesan kauza prinsipal ba dezekilibriu ka pedra ekonomia iha kapital Dili. Enkuantu investidor estranjeiru sira okupa fatin estratejiku ho lisensa legal, negosiante rai nain sira sai fali refujiadu ekonomiku neebe duni malu ho autoridade iha trotoar ninin.
Observador Politika, Martinho de Araújo lamenta ho Governu nia laran luak hodi fo fatin ba kapital boot husi rai liur, maibe la kria zonamentu ka protesaun ba negosiante kiik sira neebe foin moris.
Tanba tuir nia iha sidade laran, transformasaun husi uma abitasaun ba loja boot lais tebes. Maioria husi estabelesimentu foun neebe mak nain husi sidadaun estranjeiru, liu liu husi Xina neebe iha kbiit finanseiru hodi selu aluga rai ho folin neebe aas tebes.
“Problema laos estranjeiru mai investe, maibe Governu husik sira tama too iha setor neebe lo-loos sai kbiit rai nain nian. Se estranjeiru faan mos modo, faan mos sabaun, roupa ho sapatu folin baratu, oinsa mak povu kiik bele moris,” dehan Martinho ba STL iha Kolmera, Díli, Kuarta (08/04/2026).
Nia dehan, situasaun nee kria impresaun katak, Governu fo liu prioridade ba kosmetika dezenvolvimentu sidade, duke kria espasu dignu ba ninia sidadaun rasik hodi halao negosiu.
Iha parte ketak, negosiante neebe faan iha trotoar Perumnas, Pedro da Costa hatete, sira kumpre ordenamentu sidade, maibe governu la kria fatin neebe ema sosa barak. Merkadu foun sira neebe harii dala barak mamuk, tanba dook husi dalan boot, enkuantu fatin estratejiku sira entrega hotu ona ba Xina sira.
(car)
