BAUKAU, STLTIMORLESTE.com – Movimentu transporte publiku diresaun Vila Nova ba Vila Antiga iha Postu Administrativu Baukau Vila, Munisipiu Baukau, paradu.
Portavos transporte publiku diresaun Vila Nova Vila Antiga, Joanico Abreu Gama aprezenta razaun transporte publiku marka A1 no A2 diresaun Vila Nova ba Vila Antiga paradu, tanba implika husi presu kombustivel atual iha Munisipiu Baukau no sei aprezenta kestaun tarifa pasajeiru atual ba Diresaun Nasional Transporte Terrestre (DNTT) Baukau hodi deside tuir presu tuir presu kombustivel hafoin kontinua hikas movimentasaun.
“Ami deside lakohi halo movimentu sei hatoo ba DNTT too hetan solusiona mak foin kontinua fali movimentu,” hateten motorista Joanico Gama iha ambitu halao asaun pasifika iha Vila Nova Baukau, Kuarta (08/04/2026).
Nia sublina, asuntu neebe atu aprezenta ba DNTT, atu fo sai sekular tarifa pasajeiru nian, mak hanesan estudante husi sentavus 10 ba sentavus 15, ensinu superior husi sentavus 15 ba sentavus 25, funsionariu no pasajeiru idade boot nafatin sentavus 25 maibe aumenta mos sentavus 15 bainhira lao ho oan neebe nuudar estudante.
Maibe haree ba movimentasaun transporte publiku diresaun Vila Nova-Vila Antiga paradu, Joanico haktuir, reprezenta Servisu Munisipal DNTT Baukau konkorda ona no sei halo karta ezizensia envia ba nasional hodi buka solusaun ba ezizensia refere.
“Ami husu ba MTK atu hasai karta sirkular ba transporte publiku, nunee pasajeiru sira kumpri tuir ami nia ezizensia no ami kompromete sei hatun bainhira folin mina normal fali,” Joanico akresenta.
Entretantu tuir observasaun neebe STL nota iha terrenu, hafoin movimentu transporte publiku iha Baukau vila hanesan diresaun Vila nova ba Antiga paradu, estudante husi ensinu baziku primeiru siklu too ensinu superior husi eskola publiku no privadu neebe iha Baukau inklui komunidade vendedores, kompradores no funsionariu sira hahu lao ain husi Vila Antiga ba Vila Nova inklui lao ain husi Vila Nova ba Vila Antiga.
Enkuantu presu kombustivel atual iha postu abastesimentu sira iha Baukau Vila, hanesan produtu gazolina kada litru husi US$ 1.40 rensin too US$ 1.50 no gazoel husi US$ 1.60 too US$ 1.65 kada litru.
(tom)
