DILI, STLTIMORLESTE.com – Maktoban Pe. Anibal da Costa Miranda, ema ida neebe nakonu ho espíritu servisu pastoral forte tebes, belun ho ema hotu, obidiente, orante, disiplina, hadomi tebes servisu sira hotu neebe konfia ba nia. Nunee bainhira nia muda servisu husi Parokia Turiscai mai Fahi Nehan iha 2023 halo sarani Turiscai lao tuir nia durante loron 2 kalan 1 too Fahi Nehan, tanba deit sira nia domin neebe boot bá Padre Matebian nee.
Liu husi Omilia Arsebispu Arkedioseze Metropolitana Dili, Dom Virgilio Cardeal do Carmo da Silva, SDB hatete, nia fo sasin bá Pe. Anibal iha 2023 bainhira muda husi Parokia Turiscai hodi halao fali nia misaun nuudar Padre residensial iha Fahi Nehan. Nia hakfodak bainhira haree oinsa sarani Turiscai sira nia hadomi no apresia bá Pe. Anibal nuudar sira nia eis Amu Parokia momentu neeba. Iha loron tuir hamutuk hodi akompanha ho Amu lao liu husi Fatuberlihu bá Alas hodi too bá iha Fahi Nehan. Hakfodak tebes haree invazaun boot husi sarani sira Turiscai hahu husi labarik, joven, ferik no katuas hamutuk ho autoridade PNTL, sivil nian lao husi Turiscai loron rua kalan ida, la toba iha dalan, hodi lao tuir sira nia Amu nee.
“Iha esperiensia oan ida neebe hau fo sasin, iha 2023 hau hakfodak tebes haree oinsa ho sarani Turiscai sira nia apresia no hadomi bá Pe. Anibal nuudar sira nia Amu Parokia iha tempu neeba. Iha loron tuir lao hamutuk ho Amu liu husi Fatuberlihu bá Alas neebe Pe. Anibal muda husi sira nia Parokia Turiscai mai iha Fahi Nehan. Bainhira Amu Anibal too iha Fahi Nehan, hau hakfodak tebes, hau haree invazaun boot husi sarani sira Turiscai hahu husi labarik, ferik no katuas hamutuk ho autoridade PNTL, sivil nian lao husi Turiscai loron rua kalan ida, la toba iha dalan, hodi lao tuir sira nia Amu. Sira hatudu sira nia domin no fo sira nia aan ba amu durante tinan 12 iha Turiscai,” dehan Dom Virgilio bainhira prezide misa funebre Maktoban Pe. Anibal da Costa Miranda iha Igreja Ketedral Dili, Kuarta (08/04/2026).
Nia katak, haree bá dalan sira iha Turiscai bá Fahi Nehan nee dalan aat hotu, dalan neebe laos kaber maibe buat sira nee hotu tanba deit sarani sira nia domin bá Amu Anibal. Sarani sira fo aan tomak hodi lao tuir Amu mai iha Parokia Fahi Nehan. Ida nee hatudu ema ida fo nia aan ba sarani no domin neebe laiha rohan.
Dom Virgilio hatete, Pe. Anibal ema neebe prontu servisu iha kualker situasaun saida deit, nia la husu transporte ruma maske dalan iha Fahi Nehan ho Turiscai aat, maibe nia servisu deit iha nonok nia laran. Bainhira Dioseze muda nia bá iha Fahi Nehan, Pe. Anibal dehan, “Hau prontu bainhira dioseze fo servisu ruma,” haktuir Dom Virgilio.
Tuir nia, Amu nee, nia ema ida fuan nakloke, nakonu ho espiritu domin nian, neebe hakarak serbi bá maromak too rohan.
Kardeal nee haktuir, bainhira atu tama paskua sei husu kona-ba situasaun iha Fahi Nehan, maibe nunka rona Amu Matebian nee nia halerik sira kona-ba situasaun sira iha Fahi Nehan nian.
“Atu tama bá paskua, sei husu nia kona-ba situasaun iha neeba, maibe hau nunka rona nia halerik, nia nunka lamenta dehan estrada aat, ahi laiha no lamenta buat hirak neebe laiha. Bainhira husu kona-ba informasaun no sarani sira iha Fahi Nehan, nia dehan ami iha nee buat hotu diak hela,” haktuir Dom Virgilio.
Nia haktuir, dioseze oferese servisu bá nia, mainbe nia nunka husu, no nunka halerik bá situasaun iha Fahi Nehan, maibe nia dehan buat hotu diak. Pe. Anibal nia ema ida neebe servisu ho nonok deit.
Iha fulan kotuk dioseze hanoin ona posibilidade aselera Fahi Nehan bá futuru, nunee nia kontenti hodi kontaktu kedas sarani sira, maibe hanesan nia liafuan neebe nia dehan hela mai, se dioseze presiza, se ida nee Maromak mak hakarak, maibe iha los paskua Jesus rasik no Maromak nia planu bá ema diferente.
Iha liturjia ohin Jesus hasee feto tansa o tanis, o buka se. Hanoin katak nia mos tos nain ida. Maria hatan, Nai ita nunee tiha karik hatete took mai ba. Maria Madalena ho nia fiar katak Jesus mosu, tanba nia esperiensia domin boot bá Nai Jesus.
Hanesan Maria Madalena, depois de paskua, iha Segunda liu bá, dader nakukun simu informasaun Pe. Anibal nia mate. Ohin hamutuk iha nee laos deit sarani Turiskai no Fahi nehan, ohin iha nee hamutuk ho sarani fatin 2 nian, Padre nia pai no nia feton, bispu nain 2, akolitos sira husi dioseze 3, sarani sira hotu, Padres, madres husi dioseze tolu.
“Hanesan feto sira neebe tanis iha Jesus Nia rate, tanis tanba ita lakon ita nia ema ida, ita nia familia no ita nia ema. Ita tanis tanba Padre ida neebe moris ho tinan 51 nia foin halo 50 iha Fevreiru. Iha 51 de idade nee nia hakerek hela iha nia moris buat furak maibe laos ho liafuan, hakerek eskrita. Maibe nia hatudu iha nia servisu, nia soriso no nia simplisidade,” tenik Bispu Dioseze Dili nee.
Tuir nia katak, buat sira nee sai ksolok bá sira neebe tanis, sira neebe kiik, sira neebe fiar, sira neebe dook, sira neebe hamlaha no sira neebe hamrok bá lialos no justisa.
“Hau bele dehan besik ba dekade 2 nia laran, moris nuudar Amu Lulik, Padre Anibal buka tuir laos deit tuir bá dalan bá grasa Maromak nian no Maromak nia povu, maibe hau bele sasin bá fiar katak nia prezensa bensaun ida ba Maromak,” katak Bispu.
Nuudar Amu lulik iha tinan 18 nia laran, nia buka duni halo orasaun bá sarani sira, buka tuir sarani sira hodi harii fiar bá Maromak. Tinan 12 iha Turiscai, laos deit haree igreja Turiscai nian maibe nia hariii no hametin unidade bá sarani Turiscai no sarani sira nia fiar. Nia lao buka tuir la senti kolen, vizita sarani sira husi suku ba suku ida, hodi halibur sarani nia hakbesik aan no fiar bá Maromak.
Nia servisu makaas, la hatene kolen ba sarani sira iha Turiskai. Nia lao tuir nia aan rasik, nia buka dalan no hakas aan oferese edukasaun diak ida ba sarani Turiscai oan sira, nia nuudar aman ida iha Turiscai. Nia servisu iha pastoral durante tinan 18 la senti kolen no atu halo servisu iha situasaun saida deit, tanba deit atu buka lalehan foun no rai foun iha Nai Maromak.
(dom)
