DILI, STLTIMORLESTE.com – Ministra Edukasaun (ME), Dulce de Jesus Soares ho Diretor Nasional Corpo da Paz, Jamie Fouss, asina nota entendimentu ba daruak nian hodi apoiu ba eskola sira, liu-liu iha lian inglés nomos jestaun eskolar.
Hafoin asina nota entendimentu, Ministra Edukasaun, Dulce de Jesus Soares hatete, ME halo kooperasaun ho corpo da paz husi Estadus Unidus hodi apoiu ba eskola sira, liu-liu iha lian ingles nomos jestaun eskolar.
“Agora daudaun ita iha membru Corpo da paz hamutuk nain 19 mak oras nee daudaun iha Timor Leste no nain rua apoiu iha dezenvolvimentu kurikulu ba siklu datoluk nian hamutuk ho peritu nasional sira no sira nain 17 maka iha eskola sira”, tenik Ministra Dulce iha pajina rede sosial ME neebe STL asesu Kuarta nee (08/04/2206).
Govenante nee hatoo agradese tebes tanba ho membru Corpo da paz bele reforsa metodolojia hanorin profesor sira nian, jestaun sala de aula nomos jestaun eskolar.
Iha sorin seluk Diretór Nasional Corpo da Paz Sr. Jamie Fouss akresenta, asina nota entendimentu ida nee ho ME atu nunee halo kontinuasaun ba servisu hamutuk hodi suporta edukasaun, liu-liu iha lian ingles iha eskola siklu datoluk no ensinu sekundariu.
Entretantu pesoal corpo da paz servisu hamutuk ho eskola sira hodi hadia profesor sira-nia jestaun sala de aula no metodolojia hanorin lian ingles nomós apoiu ME iha dezenvolvimentu kurikulu ba siklu datoluk nian.
(dom)
