DILI, STLTIMORLESTE.com — Povu sai objetu ba dezenvolvimentu nee, refleta iha politika eviksaun sira neebe governu halo ba komunidade nia propetaria sira iha Dili laran, espesialmente komunidade Lavandaria, Suku Bairo Pite, Postu Administrativu Dom Aleixo.
Eviksaun neebe realiza iha Kinta (9/4/2026) meudia, sai espetakula ba komunidade Bairo Pite no komunidade husi fatin seluk neebe ba kompras iha Loja Happy 1. Iha eviksaun nee komunidade sai afetadu, haree deit sira nia uma no ai-horis neebe governu liu husi funsionariu SEATOU, PAM no polisia sobu. Laiha reasaun no laiha protesta, so iha deit oin tristeza, oin muron, hodi asiste prosesu eviksaun nee ho nonok.
Iha komentaria entre vitima eviksaun ho komunidade sira neebe hela besik, maibe sira rejeita fo komentaria ba ema oin foun inklui jornalista STL neebe marka prezensa iha eviksaun nee.
Komentaria sira nian nakonu ho duvidas ba eviksaun neebe haloo daudaun no konsidera eviksaun nee falun mos ho interese grupu no kor partidu nian, se eviksaun nee konsentra ba dezenvolmentu neebe sai slogan ba komunidade atu komunidade koopera no kontribui, estrada husi Lavandaria tun ba Aitarak Laran nee loos deit, haree borus husi Bairo Pite tun ba Aitarak Laran nian. Maibe tanba iha interese grupu salva balu nian, estrada husi Lavandaria tun ba Aitarak laran kleuk husi uma ida linha husi loja Happy 1 nian tun ba.
Uma ho kafetaria nee sobu, mak sei hetan estrada ida los deit husi Bairo Pite tun ba Aitarak Laran, maibe tanba uma ho kafetaria nee la sobu iha kurva oituan husi uma nee, husi Aitarak Laran haree sae mai labele borus ba estrada Bairo Pite.
Haree husi komentaria internal komunidade nian STL nota katak eviksaun iha lavandaria nee iha SEATOU salva nian maluk balu, tanba nee mak afeta ba estrada kleuk iha Lavandaria nian, kuandu SEATOU la salva malu, estrada husi Lavandaria nee loos deit tun ba Aitarak Laran.
Tuir vitima balu neebe lakohi fo sai naran katak, uma linha husi Loja Happy 1 nee lo-loos kona eviksaun, maibe tanba uma nain nee mesak ema husi partidu neebe kaer ukun, estrada husi Lavandaria nian tun ba Aitarak Laran hetan kleuk oituan tanba uma balu la kona eviksaun.
“SEATOU sobu nee haree sira nia maluk, tanba nee estrada nee kleur no iha kurva, se SEATOU onestu laiha kompromisu, estrada nee los deit tun ba Aitarak Laran, laos kleuk fali,” dehan komunidade iha Bairo Pite, Kinta, (9/4/2026).
Nia hatete, efeitu husi dezenvolvimentu nee mak ema tenke sai vitima, lakon uma, lakon rai, lakon ai-horis, lakon hela fatin, maibe ba dezenvolvimentu nee lo-loos laiha kompromi, se deit, atu boot fali nia uma ka rai kuandu kona tenke sobu, tanba dezenvolvimentu nee ba interese komum povu no nasaun, laos ba ema ida rua.
Tuir informasaun neebe STL asesu katak, antes nee parte SEATOU avizu ona katak iha tempu badak sei sobu uma sira neebe iha ona sinal tinta mean, tanba nee iha dader deit kareta governu ho marka oin oin deit nakonu kapela Bairo Pite oin, iha mos kareta sapa matrukula governu, nunee mos funsionariu SEATOU, funsionariu husi Munisipiu Dili, ho ekipamentu pezadu sira preparadu iha areador eviksaun nian hodi sobu uma no ai-horis komunidade nian.
Iha eviksaun nee prezensa mos membru polisia sira tantu husi eskuadra no polisia husi unidade tranzitu nian hodi regulariza movimentu transporte neebe liu husi area neeba no halo vijilansia atividade eviksaun nian lao tuir planu governu nian.
Eviksaun neebe halao daudaun iha Lavandaria Suku Bairo Pite nee atu liga kedas ho estrada boot Aitarak laran, antes nee governu sobu ona uma no ai-horis iha estrada Aitarak Laran nian sae mai Bairo Pite, uma sira neebe halo iha valeta sorin pertensia ba rai estadu nian, governu sobu hotu aplika mos indemnizasaun tuir kalklu ou tetu governu nian, nunee mos eviksaun iha Lavandaria nian antes nee foti ona dadus familia afetadu nian hodi hetan direitu indemnizasaun.
(god)
