DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial AdSA hanesan laen, tanba komete krime hasoru ofendida ho inisial JPS hanesan feen.
Iha indisus sufisiente katak, ofendida JPS moris hamutuk ho arguidu iha tinan 2008 no iha oan nain tolu.
Iha loron 25 fulan Fevereru tinan 2024, iha Lahane, arguidu hakat besik ba iha ofendida hodi komu ofendida nia liman sorin loos hodi tuku ho makas kona iha ofendida nia kexu sorin loos, halo ofendida oin halai no monu kedas ba rai, no arguidu tuku tan dala ida kona iha ofendida nia liman sorin karuk.
Konsekuensia husi arguidu nia hahalok nee, halo ofendida sente moris, oin nakukun monu ba rai, no kakorok metan no bubu. Ofendida ba halo trtamentu iha Vera Kruz.
Kauza husi problema nee tanba arguidu hemu tua lanu iha kalan to dader, no ofendida hateten ba arguidu katak, nusa la fera ai ofendida sona dosi atu fan, nunee arguidu hatan kedan dehan ofendida taka dalan ba arguidu atu hemu tua. Ho ida nee mosu diskusaun.
Tanba nee, MP akuza arguidu komete krime Violensia Domestika ho Forma Ofensa Integridade Fisika Simples neebe previstu iha artigu 145.
Hatan ba akuzasaun nee arguidu deklata katak, momentu neeba arguidu halo agresaun hasoru lezada, tanba kondisaun lanu.
Arguidu deklara tan, arepende tebes ba nia hahalok nee, no promete ba iha Tribunal sei la halo tan hahalok nee iha futuru.
Lezada reforsa tan akuzasaun katak, arguidu halo duni agresaun hasoru lezada, maibe agora sira diak malu ona.
Rona tiha arguidu nia deklarasaun, iha alegasaun Prokuradora deklara katak, arguidu konfesa ba faktus neebe iha, katak arguidu halo duni agresaun hasoru lezada.
MP haree katak, oras nee daudaun arguidu no lezada diak malu ona, sira mos hela hamutuk iha uma ida kontinua moris nudar fen no laen. Tanba nee atu halo prevensaun iha futuru, MP husu Tribunal atu aplika pena multa ba arguidu.
Enkuantu Defensor Publiku Marsal Mascarinhas, husu Tribunal atu aplika pena Admoestasaun ba arguidu, tanba sira diak malu ona.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Singular Jose Quintao, Ministeriu Publiku (MP) reprezenta husi Prokuradora Bemvinda do Rojario, arguidu hetan asistensia legal husi Defensor Publiku Marsal Mascarnhas.
(ter)
