DILI, STLTIMORLESTE.com – Tribunal Judisial Primeira Instansia Dili (TJPID) julga arguidu ho inisial SA, tanba halo agresaun hasoru lezada inisial ME.
Iha indisus sufisiente katak, iha loron tinan 2024, arguidu halo ona agresaun fizika hasoru ofendida, kazu nee lori ona ba Tribunal, maibe NUK ofendida haluha tiha ona.
Iha loron 11 fulan Agostu tinan 2025, haleu oras tuku 23:00, otl, iha Suku Madohi, Dili, arguidu SA tebe ofendida dala ida kona iha ofendida nia kidun. No arguidu tebe tan dala ida kona iha ofendida nia kidan parte los, arguidu mos kaer no buti ofendida nia ibun no arguidu tuku tan ofendida dala ida kona iha ofendida nia ren tos parte los.
Konsekuensia direta husi agresaun fizika nee ofendida hetan moras iha kidan parte los, moras kanek no ran iha ibun kulit leten, moras metan no bubu iha rentos parte los.
Ofendida ba halo tratamentu saude iha Centro saude Vera Cruz.
Kauza husi problema nee, tanba ofendida ba iha nia alin nia uma hodi rejolve problema ofendida nia alin nia oan mane nia problema, derepenti arguidu telefone ba ofendida nia alin feto no ofendida nia alin feto fo telefone ba arguidu koalia ho ofendida, nunee ofendida husu ajuda hodi tula fila fali ofendida ba uma no ofendida foin to iha odamatan arguidu hateten lia mal ba ofendida, maibe ofendida la preokupa, ofendida tama liu uma laran no tama ba kuartu laran, nunee arguidu tama tuir ba kuartu laran mak hodi mosu problema nee.
Arguidu SA halo ho forma livre, deliberada no konsientemente, hatene katak, tebe ofendida dala ida kona iha ofendida nia kidun, no arguidu tebe tan dala ida kona iha ofendida nia kidan parte los, arguidu mos kaer no buti ofendida nia ibun no arguidu tuku tan ofendida dala ida kona iha ofendida nia ren tos parte los, nudar meiu nebe aptu hodi hamosu ofensa ba lezada nia isin lolon no saude.
Arguidu hatene katak, nia hahalok nee, proibidu no punidu tuir lei penal.
Tanba nee konstitui arguidu SA nuudar autor material ho forma konsumadu tentativa ho krime ofensa ba integridade fizika simples ho forma Violensia Domestika 1 ida, previstu no punidu tuir artigu 145° husi kodigu penal konjuga ho artigo°35° alinea B husi lei kontra Violensia Domestika n°07/2010 loron 07 Fulan Julhu.
Hatan ba akuzasaun nee, arguidu konfesa imparsial ba faktus. Arguidu deklara katak, momentu neeba ofendida sira ba hare ema rejolve problema, maibe arguidu kontaktu ba ofendida la foti.
Ho nunee maka arguidu kontaktu ba ofendida nia alin, fo telefone ba ofendida koalia ho arguidu, no ikus mai ofendida fila mai uma no hamosu problema.
Arguidu arepene tebes, hahu husi neeba mai to agora la iha tan problema ona.
Hare arguidu konfesa imparsial, Tribunal deside tama ba iha alegasaun.
Iha alegasaun Prokurador husu Tribunal atu aplika pena multa ba arguidu. No defeza arguidu nian mos aseita ho pedidu neebe MP husu.
Rona tiha alegasaun, Tribunal adia ba loron seluk hodi rona desizaun.
Prosesu nee, prezide husi Juiz Estajiadu nain ida, Ministeriu Publiku reprezenta husi Prokurador estajiadu nain ida, arguidu hetan asistensia legal husi Defensor Publiku Anzelmo Akara.
(ter)
