BAUKAU, STLTIMORLESTE.com – Kama ba partus iha sala maternidade Hospital Rejional Eduardo Ximenes (HoREX) Baukau kuaze ferujin.
Diretor Ezekutivu HoREX, Claudino Ximenes rekonhese, kama partus atual iha sala maternidade HoREX balu kondisaun hahu ferujin ona, tanba antiguidade husi eis Hospital Tirilolo Baukau neebe kontinua utiliza iha HoREX.
“Kama sira nee ita halo manutensaun pinta dala hira tiha ona, maibe kama sira nee dala ruma foer kona, ita atu hamoos mos nia ferujin nafatin,” Diretor Ezekutivu HoREX Claudino Ximenes informa ba jornalista sira iha nia knaar fatin HoREX Baukau, Segunda (13/04/2026).
Nia sublina, mezmu kama partus sira iha sala maternidade HoREX Baukau balu ho kondisaun ferujin, maibe sei seguru hodi utiliza, neebe seidauk iha impaktu negativu ba inan gravida sira bainhira partus uza kama refere.
Nia fundamenta, kondisaun kama iha sala maternidade HoREX Baukau, ekipa nasional rekolha ona informasaun no relata ona ba Ministeriu Saude, neebe daudaun prosesu ona atu apoiu kama partus foun ba sala maternidade HoREX Baukau.
“Prosesu tenderizasaun lao hela, tinan ida nee ita bele hetan tan kama foun, kiik liu rua, nia bele too haat ou neen ita bele hetan,” Claudino akresenta.
Entretantu sala maternidade HoREX Baukau iha kuartu rua, kuartu ida ho kama partu 3 foun, enkuantu kuartu ida seluk iha kama partu tuan iha neebe kama 1 dudu sai ona husi sala refere hafoin hetan kritika husi entidades balu iha media sosial.
(tom)
