BAUKAU, STLTIMORLESTE.com – Autoridade Munisipal Baukau (AMB) reativa hikas ekipa task force atu prevene tramisaun virus raiva iha Munisipiu Baukau.
Sekretaria Munisipal Asuntu Sosiais Organizasaun no Komunitaria, Maria Celestina Viegas aprezenta, hafoin virus riava sirkula iha Munisipiu seluk iha territoriu nasional, mak Autoridade Munisipal Baukau inisia ekipa task force neebe involve husi Diretor Servisu Munisipal sira, Servisu Delegasaun Territorial, Komadante Polisia Munisipiu Baukau, Forsa Terrestre Lanud Baukau, neebe ekipa nee lidera husi Prezidente Autoridade Munisipiu Baukau, Veneranda Lemos, objetivu atu halo prevensaun virus riava iha Baukau.
Maibe iha fulan Abril tinan 2026 nee Munisipiu Baukau risku ona ba virus riava, tanba afeta ona ba komunidade balu iha Suku Gariuia no Bagu.
“Ho risku mean ida nee hanesan ekipa task force ami esforsu hamutuk ho estrutura tomak oinsa halo sosializasaun ba komunidade sira,” aprezenta Sekretaria Munisipal Maria Celestina Viegas ba jornalista sira, hafoin enkontru ho ekipa task force iha sala enkontru Servisu Munisipal Saude Baukau, Segunda (13/04/2026).
Nia sublina, aleinde sosializasaun ekipa sei aviza liu husi eskola no igreja, nunee estudante no sarani sira kontinua introdus ba komunidade halo prevensaun ba virus refere.
Nia fundamenta, fatin tarjetu ba ekipa task force atu halo sosializasaun, aleinde mos fo vasina ba animal sira mak iha Postu Administrativu Baukau Vila liu-liu suku afetadu sira.
“Hatoo ba ita nia komunidade sira, se karik iha asu kopera malu bele halo vasina tiha, nunee ita bele halo prevensaun kura kedas iha neeba,” Maria Celestina Viegas.
Nia deklara, animal asu iha oin tolu, kompostu husi tipu hakiak, abandona no fuik, tanba nee bainhira ekipa tun sei fo vasina ba asu hakiak sira, enkuantu asu fuik no abandona bainhira Autoridade Suku hetan informa ba ekipa task hodi halo atuasaun.
Iha fatin hanesan, Medika Veterinaria Zelia Ximenes relata, iha fulan Abril nee ekipa veterinaria Baukau rejistu ona kazu raiva haat iha Postu Baukau Vila, iha neebe kazu hirak nee pozitivu raiva, ida rejistu iha Suku Gariuia afetadu ema nain rua no pozitivu raiva ida, iha Suku Bahu afetadu nain ida, enkuantu rua seluk konsidera suspeitadu ba raiva neebe rejistu iha area Watulete Suku Tirilolo.
“Ita husu ekipa task force nee metin halo sosializasaun no sensibilizasaun ba komunidade sira, haree animal sira neebe agora movimentu livre para ita hakotu raiva iha Baukau,” Zelia rekomenda.
Nia husu komunidade sira neebe iha animal hakiak sira hanesan asu, busa no lekirauk ho voluntariamente lori ba ekipa veterinaria Baukau hodi ekipa fo vasinasaun, tanba daudaun nee ekipa veterinaria seidauk tun iha Postu Baukau Vila inklui Postu seluk iha Baukau hodi fo vasina ba animal sira neebe mensionadu.
Entretantu ekipa veterinaria halo ona servisu prevensaun liu husi vasina animal hakiak sira hanesan asu, busa no lekrauk, neebe hahu ona iha loron 27 Outubru 2025 no too loron 07 Novembru 2025, iha Postu Administrativu Vemasi kobre Suku Vemasi Tasi, Waigae, Kaikua, Ossouala, Watulari, Ostiku no Loilubu.
Husi kobre suku hirak nee, aninal hakiak neebe vasinadu hamutuk 1.619 kompostu husi asu 1.541, busa 63, lekirauk 15 husi animal rejistradu 2.075 no atual stok aimoruk vasina sei iha 185 dozes.
(tom)
