VIKEKE, STLTIMORLESTE.com – Sidadaun Maria da Silva Husi Ossu, Vikeke husik hela mundu antes entrega uma mahon husi Prezidente Republika, Jose Ramos Horta.
Maktoban Avo Maria da Silva, residente iha Uaguia, Postu Administrativu Ossu, Munisípiu Vikeke, hakotu ona nia vida iha loron 08 Abril 2026 tanba kondisaun moras. Avo Maria nia destinu akontese iha momentu neebe nia seidauk konsegue aproveita uma mahon neebe konstrui hela husi Prezidensia Republika.
Uma mahon refere, agora daudaun sei iha faze konstrusaun, konstrui husi Ekipa Komunitaria Unidade Servisu Sosiedade Sivil no Asuntu Sosial (SSAS) Prezidensia Republika, tuir pedidu husi autoridade lokal. Inisiativa ida nee hahu tiha ona ho serimonia lansamentu “Primeira pedra” iha fulan Marsu 2026.
Tuir komunikadu Segunda (13/04/2026) katak, durante nee Avo Maria hela iha uma ho kondisaun ladun diak, hamutuk ho nia oan mane ida, Jose Barros, neebe mos sofre ho problema saude mental. Iha situasaun nee, família no vizinu sira mak kontinua tau matan ba sira ho sentidu apoiu solidariedade.
Pedidu hodi hetan uma mahon nee mai husi inisiativa joven sira iha bairro laran, observa direta ba familia nee nia kondisaun, nunee sira koopera hamutuk ho autoridade lokal, hodi halo Pedidu ida lori ba Prezidente Republika, J. Ramos-Horta. Liu husi Unidade Asuntu Sosial (SSAS) Prezidensia Republika hodi responde direta ho asaun konkreta liu husi konstrusaun uma refere.
Maski Avo Maria la konsegue haree Uma nee nia finalidade, maibe família kontinua hatoo agradesimentu ba Prezidente Republika tanba apoiu neebe fo ona, inklui ajuda ba prosesu funeral.
Iha kontestu nee, Prezidensia Republika kontribui mos apoiu finanseiru ba seremonia funeral, inklui ai-han no nesesidade basika hanesan foos (25 kg saka-5), mina bimoli (5 litru, kaixa 2), supermie (kaixa-5), manutolun (kaixa 1) no osan cash hamutuk $250. Husi montante nee, $50 uza hodi sosa ai-funan no restante US$ 200 entrega ba família, liu husi oan feto no oan mane Jose Barros.
Autoridade lokal no komunidade sira espera katak konstrusaun uma mahon nee bele kontinua too remata, hodi sai patrimoniu importante ida ba família neebe hela iha kondisaun vulneravel iha area refere.
(eme)
