BAUKAU, STLTIMORLESTE.com – Kestaun privasidade, Diretor Ezekutivu Hospital Rejional Eduardo Ximenes (HoREX) Baukau, Claudino Ximenes husu vizitante labele hasai foto no halo video iha sala maternidade.
Claudino Ximenes aprezenta, iha loron 04 Abril tinan nee sala maternidade HoREX Baukau simu pasiente inan isin gravida ida ho kondisaun abortu, nunee iha loron refere parteira sira atende pasiente refere too hotu no autoriza familia sira halo vizita pasiente refere, maibe liu oras balu video ida husi fatin pasiente toba ba viral iha media sosial.
“Regras loloos nee labele hasai fotografia video iha sala sira nee, satan iha sala partus, loloos nee labele akontese, maibe sorte nia hasai deit kama, se nia hasai hotu inan sira neebe toba iha neeba foin partus nee karik, ita halo oinsa,” Claudino Ximenes hateten ba jornalista sira iha nia knaar fatin HoREX Baukau, Segunda (13/04/2026).
Nia rekonhese, mezmu video husi sala maternidade HoREX Baukau neebe espalha iha media sosial kona-ba kondisaun kama neebe ferujin, maibe regras bandu laiha pesoal ida mak foti fotografia no video iha sala baixa sira no sala maternidade, tanba kestaun privasidade ba pesiente neebe toba no baixa iha sala refere.
Nunee hafoin video kona-ba kama ferujin husi sala maternidade HoREX Baukau espalha iha media sosial hetan kestiona makaas husi Ministeriu Saude, tanba tuir loloos karik entidades balu hetan falanshu iha Hospital liu liu sala maternidade no sala seluk pasiente baixa hatoo deit ba dirijente Hospital hodi solusiona, laos halo postajem iha media sosial.
“Loos duni ida nee falha iha ami nia seguransa, tanba ami autoriza ba vizita familia maibe ho intensaun seluk tau media sosial hodi hetan viewer,” Claudino komenta
Entretantu tuir observasaun neebe STL asesu iha iha loron 13 Abril nee, dirijente HoREX mos halo ona enkontru ho seguransa sira atu tau atensaun mos ba vizitante sira neebe tenta hasai fotografia no video iha sala maternidade no sala baixa sira iha HoREX Baukau.
(tom)
