DILI, STLTIMORLESTE.com – Ministru Justisa (MJ), Sergio Hornai asinatura termu kontratu servisu ho empreza rua (2), Mojes Enterprise Unipesoal no PT Sangkurian Ensijur husi Indonézia atu halo dezenhu ba estabelesimentu sentru koresional Weberek, neebe lokaliza iha Postu Administrativu Alas, Munisipiu Manufahi.
Kontratu servisu nee dura fulan neen too tinan ida, empreza hahu halo servisu husi loron asina kontratu nee too termina.
Enkuantu orsamentu ba iha dezenhu estabelesimentu Prizaun Weberek nee ho kustu osan US$ 196.999.60 no prizaun Weberek nee estabelese iha terenu 100 hektar neebe Ministeriu Justisa liu husi Terras Propriedade liberta ona.
“Ohin ita asina akordu ida ou asina kontratu ida ho kompanhia dezenhu ba iha sentru koresional Weberek ninian,” dehan Ministru Justisa, Sergio Hornai ba jornalista sira iha Kaikoli, Tersa (14/04/2026).
Nia esklarese, planu ba estabelesimentu nee hahu kedan iha Primeiru Governu too mai kedas Nunu Governu, foin mak realiza liu husi estudu neebe naruk, liu husi prosesu neebe naruk tebe-tebes hodi haree mos ba kondisoes prizaun tolu neebe mak iha.
Nia dehan, komesa ho avansu ida no ohin realiza kontratu ida ho kompanhia ba dezenhu sentru koresional Prizaun Weberek ninian.
MJ sublina, sentru koresional Weberek nee ho objetivu prinsipal ida atu eleva konesimentu reklusu sira-nia liliu, oinsa atu produtivu liu tan iha area formasaun vokasional.
Sergio akresenta, sentru ida nee importante tebes-tebes atu eleva ema sira neebe hetan ona desizaun definitiva, para sira bele halo atividade produtivu ruma iha fatin ida nee. Tanba nee halo atu bele fo formasaun ba ita nia prizioneriu, atu nune sira bele hasae sira-nia abilidade nomos bele eleva tan sira-nia konhesimentu iha formasaun vokasional balun, nunee bele forma sira bele lao tuir dalan diak, kuandu sira reintegrasaun ba sosiedade sira iha fali ona konhesimentu neebe foun bainhira ba fali fatin neebe nia atu reinregra ba ho normal.
Afirma tan, Sentru Koresional tama iha programa IX Governu Konstitusional mos atu orienta hanoin boot ba iha neeba, sentru koresional hodi eleva prizioneriu sira nia konhesimentu iha neeba, tanba nee mak ohin Ministeriu Justisa realiza asina kontratu ho empreza rua, ida husi Indonézia hamutuk ho nia parseiru Timor oan neebe sai ajudikasaun ka vensedor atu halo dezenu nee.
Tanba nee, hein katak ho grasa Maromak nian buat hotu lao diak, para sira bele produs dezenhu ida ke diak bele reprezenta ita nia interese, hodi nunee futuru ita bele konklui atu bele lori prosesu sira ba oin, nunee halo konstrusaun obra ninian iha futuru.
Hatan kona-ba empreza la halo tuir kontratu, Ministru Justisa Sergio Hornai hateten, Governu sei foti medida tuir lei aprovizionamentu neebe mak iha atu fo sansaun.
Iha fatin hanesan, Diretor ba empreza Mojes Enterprise Unipessoal.Lda, Acácio De Jesus hatete, selebra kontratu ida nee hodi hein deit atu ba survei fatin produsaun iha Weberek.
“Ami asina kontratu, ami sei halo servisu bazeia ba nain nia deseju no hakarak, kontratu ida nee nia servisu prinsipal mak sei halo survei ba fatin no ami sei halo estudu ami sei halo dezenhu,” dehan Acacio.
Nia hatutan, kontratu ba prazu nia tempu nee sira fo ba kompanhia fulan 6 ka 180 dias.
Sublina, sira tenke kumpri ba loron neebe sira fo, maibe karik interven husi fator exernal, entaun sei halo koordenasaun ba nain ba projeitu, tanba iha dezafiu iha rua deit, ida fator esternal liu-liu mak koordenasaun projeitu rasik sei inklina ho Ministeriu Obras Publika, ADN, se karik projetu nee lao mak linha koordenasaun ladun diak bele interven ho tempu neebe badak.
Akresenta tan, fator daruak mak empreza mos sei halo revizaun dezenhu neebe mak iha, no sei haree ba pagamentu no administrasaun, karik rua nee mak halo kooperasaun nain ba projeitu nee ladun diak bele iha intervensaun iha tempu hanesan.
(ter)
