DILI, STLTIMORLESTE.com – Tuir observasaun STL iha terenu katak, Primeiru Ministru (PM) Kay Xanana Gusmão mai iha Diresaun Nasional Servisu Investigasaun Kriminal Nasional (DNSIK), Komando Jeral Polisia Nasional Timor Leste (PNTL) hodi husu ba Komandante Jerál PNTL, Komisáriu Asisténte Afonso dos Santos atu orienta membru sira kontinua halo operasaun ba osan falsu nee.
Xefe Governu mai iha kuartel Jerál PNTL, oras 15:40 OTL, no hetan akompanha husi Komandante Jerál PNTL, Komisáriu Asisténte Polísia Afonso dos Santos no Segundu Komandante Jerál PNTL, Komisária Asisténte Natercia Eufrasia Soares Martins.
Prezensa Xefe Governu iha Kuartel Jerál PNTL nee halo polísia sira iha Kuartel Jeral PNTL Kaikoli hakfodak, tanba derepente deit PM Xanana Gusmão hakarak tama kedan ba sala Unidade Polisia Teknika Diresaun Servisu Investigasaun Kriminál Nasionál nian.
Primeiru Ministru Xanana Gusmão marka prezensa iha Kuartel Jerál PNTL hetan akompanhamentun husi nia seguransa pesoál sira.
Hafoin halo enkontru ho Komandante Jerál PNTL, Komisáriu Asisténte Polísia Afonso dos Santos no Segundu Komandante Jerál, Komisária Asisténte Natercia Eufrasia Soares Martins no Diretor Servisu Investigasaun Kriminál, Superintendente Xefe Polísia Joao Belo, maibe la koalia ho media no nonok hodi tama ba kareta laran.
Bainhira jornalista konfirma kona-ba buska no apreensaun ba osan neebe suspetadu falsu neebe Servisu Investigasaun Kriminál Nasionál iha armajen Xineza nian iha Area Bidau Masaur, Aldeia Sagrada Família, Suku Bidau Santa Ana, Postu Administrativu Kristu Rei, Munisípiu Dili, Xefe Governu Xanana Gusmão lakohi fo komentáriu no sae kedan kareta.
Iha fatin hanesan, Komandante Jerál PNTL Komisáriu Asisténte Polísia Afonso dos Santos, hateten, ohin Primeiru Ministru (PM) Kay Rala Xanana Gusmão mos ba haree ona buat sira nee hotu.
“Maibe orientasaun maun boot, operasaun sei lao nafatin. Komandante Operasaun mak nee, Komandante Investigasaun Kriminál neebe PNTL hau fo ona orden para operasaun iha Timor laran tomak kona-ba osan ida nee. Seluk seluk laiha, ida nee mak hau bele hatoo,” hatete Komandante Jerál PNTL, Komisáriu Asisténte Polisia Afonso dos Santos ba jornalista sira iha Komando Jerál PNTL Kaikoli, Kuarta (15/04/2026).
Nia deklara, nuudar Komadante Jerál la tolera ba kazu osan falsu nee.
“Ida nee hau sei la tolera, hanesan Komandante Jerál PNTL asuntu hanesan nee, se deit hau la tolera ida. Ida nee mak deteta ona, polísia halo kapturasaun entrega ba justisa, seluk seluk laiha, ida nee mak hau bele hatoo”, nia afirma.
(jen)
