DILI, STLTIMORLESTE.com — Estudantes husi Pre-Sekundari nu. 4 Fatumeta, oras nee halimar deit hodi hein feriadu paskua nian, depois atravesa ezame primeira periodu anu letivu 2026 nian iha semana liu ba.
Nunee mak hahu Segunda feira too Kuarta (15/4/2026), estudantes sira mai iha eskola halimar deit iha areador eskola no mos iha liur areador, tanba seidauk iha avizu ofisial husi eskola konaba feriadu ezame primeiru periodu ka feriadu paskua nian.
Tuir observador STL iha terenu nota katak, iha Segunda feira estudante sira mai husi uma lori aifunan hodi kuda iha eskola, hanesan atividade estrakurikuler ida neebe parte eskola halo atu hamburas eskola depois tama ba periodu feriadu nian. Maibe depois nee laiha tan atividade seluk, nunee estudante sira mai eskola, halimar deit, depois fila uma.
Nunee mos profesor sira sei mai eskola hodi halao servisu hanesan halo koresaun ba materia ezame, no atividade seluk iha eskola nian, depois to tuku 12 fila ba uma, atividade loraik nian laiha, nunee la hetan tan estudantes hatais uniforma eskola nian iha areador eskola no mos iha liur.
Estudantes Anosa dehan, desde segunda too kuarta nee laiha aula, tanba foin hakat liu ezame primeiru periodu anu letivu 2026 nian, agora estudante sira mai eskola halimar deit, ho objetivu atu rona orariu eskola nian depois ezame no feriadu ezame primeiru periodu.
“Ami mai eskola atu rona orariu no rona avizu feriadu ezame ka feriadu paskua nian, depois ezame, maibe to agora seidauk iha avizu,” dehan Anosa ba STL iha Aldeia Rai Nain, Suku Bairo Pite, Kuarta (15/4/2026).
Nia dehan maske laiha aula, estudante sira sei mai eskola, nunee mos profesor sira, dadersan mai eskola, meudia fila ba uma, tuir oras servisu nian, maibe profesor sira iha deit salah profesor nian too fila, seidauk iha avizu ruma husi eskola.
Iha eskola pre-sekundaria no 4 Fatumeta, alen utiliza ba atividade aprendizajen, iha mos grupu balu utiliza a atibidade arte marsiais nian, iha lokraik to kalan, joven foinsae sira neebe intersadu ho atividade artemarsiais nian envolve treinu arte marsiais nian, klaru nee artemarsiais legal hanesan Tae Kuwondo, atividade nee kleur ona, nunee iha eskola pre-sekundaria fatumeta, iha atividade loron ba aprendezajen, atividade kalan nian mak arte marsiais.
(god)
