DILI, STLTIMORLESTE.com – Partidu Libertasaun Popular (PLP) ezije ba Ministeriu Interior no Polisia Nasional Timor Leste (PNTL) atu halao investigasaun neebe klean no seriedade total ba kazu apreensaun ka prende osan falsu, ho montante boot kuaze milhaun US$ 4 resin neebe akontese iha area Bidau Santana, Díli.
Operasaun neebe halao husi Diresaun Nasional Servisu Investigasaun Kriminal (DNSIK) iha armajen Xina nian ho naran ka kodiku YdW foin lalais nee, konsideira hanesan apreensaun ka prende osan falsu boot liu iha istoria Timor-Leste (TL) nian. Ho montante neebe hakat liu milhaun US$4 resin, kazu nee lori preokupasaun boot ba seguransa Estadu nian.
Visi Prezidente Partidu Libertassun Popular (PLP), ba Assuntu Orgaun Asosiadu no Movimentu, Amilcar dos Reis Araujo “Hatenu” manifesta sira nia preokupasaun makas no husu atu prosesu legal nee lao ho kredibilidade.
“Ami ezije investigasaun ida neebe klean, Polisia labele para deit iha apreensaun ka prende deit osa, maibe tenke buka tuir se mak nain ba armajen nee, se mak hatama osan sira nee no rede kriminal se mak iha kotuk, tanba povu presiza resposta neebe klaru,” deklara Amilcar ba STL, iha nia rezidensia, Manleuana, Díli, Kuarta (15/04/2026).
Ba PLP, prezensa osan falsu ho kuantidade boot hanesan nee hatudu katak iha falha iha sistema kontrolu fronteira rai maran, Aeroportu no Portu nian.“Se osan hirak nee serkula iha merkadu ida nee sei hamate negosiante kiik sira, no estraga konfiansa parseiru internasional sira nian ba sistema finanseiru Timor-Leste,” dehan nia.
Aleinde nee Nia mos husu ba Banku Sentral Timor Leste (BCTL) atu foti medida urjenti hodi proteje sistema kreditu, no tranzasaun iha merkadu. Sira tauk rede kriminal neebe hatama osan hirak nee bele hamosu valor osan dolar nian neebe TL uza dadaun.
Iha parte ketak Akademista UNPAZ, Luciano Mendonca konsideira kazu nee hatudu falhansu iha monitorizasaun sosial. Nia kestiona oinsa mak armajen ida iha area neeba ema hela nakonu bele rai sasan ilisitu sein avizu husi autoridade lokal sira hanesan Xefe Suku no Polisia Komunitaria.
Dadaun nee Polisia Nasional Timor Leste (PNTL) foti ona medida hodi taka area refere, no halao hela investigasaun ba evidensia sira neebe konfiksa.Too oras nee publiku sei hein hela informasaun foun husi DNSIK, kona-ba detensaun ba suspeitu sira neebe envolve iha kazu nee.
(car)
