BAUKAU, STLTIMORLESTE.com – Presu nesesidade baziku iha Postu Administrativu Baukau Vila, Munisipiu Baukau hahu mudansa, tanba impaktu husi presu kombustivel neebe mos fo impaktu ba trabalhador nain 10 resin lakon servisu iha loja Gemea Baukau.
Nain ba loja Gemea Bernardo Domingos Guterres aprezenta, folin nesesidade baziku iha merkadu Baukau Vila hetan mudansa iha fulan abril nee, iha neebe fos kilograma 25 neebe antes presu US$ 12.00 kada saka, hahu sae ona ba US$ 13.00, mina tein jereken litru 5 neebe antes nee kada jereken ho folin US$ 6.50 atual sae ba US$ 7.50, kafe falun neebe antes nee kaixa ida ho folin US$ 108.00 iha loron 16 Abril nee atinji ona US$ 114.00.
“Iha fulan kotuk liu ba nee ema mai kompras nee barak, tanba folin sasan sira nee la sae, agora sasan sira nee folin sae entaun ema mos mai kompras agora nee menus ona,” Bernardo hateten ba STL iha nia loja Gemea Vila Nova Baukau, Sesta (17/04/2026).
Nia relata, presu sasan nesesidade baziku neebe atual aplika iha loja Gemea, bazeia ba presu neebe aplika iha empreza grosir sira iha kapital Dili, nunee faan iha Munisipiu aumenta presu husi presu iha kapital Dili hodi hetan rendimentu.
Maibe Bernardo sublina, presu atual iha Baukau Vila neebe iha ona mudansa hatauk loja nain sira inklui loja Gemea neebe antes nee tula sasan nesesidade bazika sira ho karreta husi Baukau Vila ba faan sasan iha Postu Administrativu sira inklui ba faan iha Munisipiu Lautem, deside hapara atividade refere, tanba presu kombustivel sae hanesan produtu gazoel atinji ona US$ 1.65 kada litru.
Husi presu kombustivel neebe sae hodi prejudika movimentu ba atividade ekonomia iha Baukau, loja Gemea mos hapara ona nia trabalhador nain 10 resin kompostu husi motorista, faan nain sira inklui trabalhador seluk tan.
“Hau tenke hapara hau nia trabalhador sira, tanba atu uza saida mak hodi selu, tanba sira nee ami dezaraska liu husi atividade sira nee mak selu, mais agora la lao ona, ema sosa mos laiha ona entuan hau hapara,” Bernardo argumentu.
Entretantu liga presu nesesidade baziku neebe STL asesu iha loja Gemea hodi observa fali iha loja sira neebe eziste iha Baukau Vila, maibe trabalhador sira la fo presu, tanba razaun laiha nain ba loja.
(tom)
