DILI, STLTIMORLESTE.com – Dezenvolvimentu setor saude no edukasaun tenki lao hamutuk, tanba rua nee sai fatin importante ba futuru nasaun nian.
Liafuan nee haktuir husi Sekretariu Estadu Ensinu Sekundáriu Jeral no Ensinu Sekundáriu Tékniku Vokasionál (ESG-ESTV), Domingos Lopes Lemos, bainhira partisipa iha serimonia inaugurasaun edifísiu foun postu saude no uma ba mediku iha Lebeluli, Suku Ducurai, Postu Administrativu Letefoho, Munisípiu Ermera, Kinta (16/04/2026).
Iha intervensaun Sekretariu Estadu, Domingos Lopes Lemos hateten, inaugurasaun postu saude no uma ba mediku importante tebes ba Komunidade Letefoho, tanba fasilita asesu servisu saude neebe besik liu ba povu.
“Infraestrutura hanesan postu saude no uma ba mediku nee sei ajuda hamenus difikuldade komunidade atu hetan tratamentu saúde, liu-liu ba inan isin-rua, labarik no katuas sira. Governu kontinua kompromete atu hadia kualidade moris povu liuhusi servisu saude no edukasaun,” hateten nia.
Nia katak, dezenvolvimentu setor saude no edukasaun tenki lao hamutuk, tanba rua nee sai fatin importante ba futuru nasaun nian. Ho fasilidade foun nee, espera katak estudante sira mos bele aprende iha ambiente neebe diak liu, ho saude neebe diak.
Xefe Suku Ducurai no reprezentante komunidade lokal sira mos agradese ba Governu ba konstrusaun infraestrutura nee, neebe konsidera hanesan resposta ba nesesidade tempu naruk nian iha area refere.
Serimónia inaugurasaun nee marka pasu importante ida iha esforçu Governu atu hadia servisu saude basiku iha area rural, liu-liu iha Munisípiu Ermera, neebe durante nee hasoru hela limitasaun asesu ba fasilidade saúde.
Governante nee mos husu ba komunidade Letefoho, atu haree no kuidadu hanesan imi-nia uma rasik.
Inaugurasaun nee hetan partisipasaun masimu husi, Visi Ministru Estatal, Jacinto Rigoberto, Visi Ministru Saude, Jose dos Reis Magno, PAM Ermera, José dos Santos Soares, Autoridade Postu, suku no aldeia, pesoal saude sira ho komunidade Suku Ducurai Postu Adminsitrativu Letefoho nian.
(dom)
