DILI, STLTIMORLESTE.com – Governu soe ona osan hamutuk milhaun US$ 186,8 husi kofre estadu nian ho razaun atu proteje povu husi hasae folin kombustivel, maibe loron ba loron realidade iha bomba gazolina ho gazoel nian hatudu oin seluk, folin kontinua sae nafatin. Pratika nee agora sai kestionamentu boot husi Partidu Libertasan Popular (PLP) neebe deskonfia katak, subsidiu nee sai deit hanesan transferensia riku soin husi Governu ba elit negosiu sira.
Visi Prezidente Partidu Libertassun Popular (PLP), neebe trata Assuntu Orgaun Asosiadu no Movimentu, Amilcar dos Reis Ataujo ‘Hatenu’ kestiona tanba sa Governu la iha kbiit atu kontrola presu, maski selu ona parte husi kustu kompahia sira nian.” Se Governu fo osan, Governu iha Diretu atu fiksa presu. Se presu la tun kualker osan neebe fo ba kompahia sira nee bele konsideira prezente neebe la iha baze legal ba interese publiku,” hatete Amilcar ba STL, iha nia rezidensia Manleuana, Díli, Kuarta (22/04/2026).
Tuir Avaliasaun neebe Amilcar aprezenta, nia kestiona mos kona-ba se mak kontrola katak litru ida gazolina neebe sosa iha bomba duni mak litru neebe hetan ona subsidiu. Nia mos deskonfia katak, kompahia sira uza subsidiu hodi kobre sira nia lakon iha fatin seluk ka aumenta deit sira nia riku soin rasik.
Eis Membru F-FDTL nee husu ba Konselhu Ministru (KM) atu laos deit fo sai dekretu lei, maibe tenke fo sai relatoriu ezekusaun finanseira neebe detalhu kompahia nee simu hira, bazeia ba kalkulasaun saida no tanba sa, mak presu iha merkadu la tuir valor subsidiu neebe fo ona.
“Se Governu la konsege hatan kestionamentu sira nee, ita konsideira subsidiu nee hanesan falha boot ida iha kofre Estadu nian neebe presiza investigasaun husi instituisaun relevante sira,” dehan nia.
Enkuantu ba povu kiik, osan milhaun US$ 168,8 nee hanesan deit numeru ida neebe maran iha dalan. Tanba iha baze motorista no negosiante sira la sente folin nee tun.
“Ita kolia kona-ba osan povu nian, osan mina rai nian, triste mos osan nee fo deit ba kompahia boot sira, maibe povu kontinua dudu motor, tanba osan la iha atu sosa gazolina,” hatete Akademista UNPAZ, Antônio da Costa.
(car)
