DILI, STLTIMORLESTE.com – Prezidente Republika (PR) Jose Ramos Horta prontu kolabora ho Governu bainhira iha planu halo alargamentu ou evikasaun kona nia uma.
Prezidente Republika Jose Ramos Horta hatoo kestaun nee ba jornalista bainhira remata halo inaugurasaun edifisiu foun ADB iha Farol, Dili, Tersa lokraik (21/04/2026).
Prezidente ho halimar hatete bainhira SEATOU, Germano Dias Brites ba Rezidensia Prezidente hodi halo alargamentu, Prezidente tebe tiha SEATOU maibe koalia ho hamnasa, maibe Prezidente deklara katak nia prontu koopera ho Governu.
“Lae, hau hatete tiha ona ba iha MOP, hau kolabora buat neebe estadu presiza atu muda jardin iha liur oin nee bele hasai, se hakarak hasai moru boot nee bele tanba laos hau mak tau moru boot nee, uluk 2008 governu mak tau fali moru boot nee, hau la gosta atu hatun karu teb-tebes tanba sira tau sementi forti, besi forti, hau rasik hatun osan lubuk ida entaun MOP mak atu hatun para aumenta estrada nee diak liutan, hau la aseita ho ida nee,” dehan Prezidente Republika.
Prezidente hatete maibe atu hatun moru ka saida nee lubuk ida los, no iha kraik nee PLP nia office neeba, se hatun moru Prezidente Republika nian entaun hatun mos PLP nia servisu fatin nee.
Karik Governu sobu moru Prezidente nian, presiza indeminizasaun ka lae. Hatan ba kestaun nee Prezidente Republika hatete nia la presiza selu indeminimizasaun. “Lae hau la husu ida nee lalika,” dehan Prezidente Horta.
Xefe Estadu argumenta liu tan katak nia prontu koopera ho Governu liu husi MOP nomos SEATOU atu halo alargamentu ba nia moru, maibe Prezidente lakohi haree SEATOU nia oin. “Hau prontu koopera, maibe hau lakohi haree mak Germano nia oin,” hakotu nia.*
(eme)
