DILI, STLTIMORLESTE.com – Xefe Estadu sujere, Governu kria prizaun ketak ba inan sira bainhira oan kiik ba hotu.
Prezidente Republika Jose Ramos Horta hatoo kestaun nee ba jornalista bainhira remata halo inaugurasaun ba Edifisiu foun ADB iha Farol, Dili, Tersa lokraik (21/04/2026).
Liga ho kazu neebe viral iha media sosial, inan ida tama prizaun kous ho oan tama hotu ba prizaun, ho ida nee Prezidente tau atensaun makaas ba labarik neebe ho inan tama hotu komarka nee.
“Nee tenke haree hasai labarik, problema boot mak ida nee, labarik bebe oan nee nia sente nia Mãe ema seluk, kaer nia nee nia psikolojia nee nia moris mai ho trauma, entaun lolos nee haree fatin ida iha prizaun neebe ketak para inan ho nia oan nee ho kondisaun diak, maibe kuandu oan nee boot ona uituan tenke haree se mak tau matan ba labarik nee, hau akompanha problema nee metin tanba hau nia responsabilidade nuudar Prezidente laos fasil, foin dadauk hau halo indultu ba ama ida iha prizaun tan deit nia oan labele moris, boot fali iha prizaun,” katak PR Horta.
Iha informasaun neebe iha hatudu iha prizaun Gleno ho apoiu husi UNDP iha tinan 2022 hodi reablita bloku ida ketak iha laran sela hamutuk 7 ho padraun internasional hodi akumula prizioneiru feto sira atu bele sente seguru no komfortavel halao atividade, inklui mos tau matan ba sira nia oan.*
(eme)
