LAUTEM, STLTIMORLESTE.com – Iha loron 27 Abril parte loraik, lafaek hamate tan labarik feto ida iha Postu Administrativu Lautem, Munisipiu Lautem.
Komandante Operasaun Autoridade Protesaun Sivil, Munisipiu Lautem, José Agostinho da Costa Pacheco aprezenta, insidente nee akontese iha loron 27 Abril parte meudia nee no parte ekipa bombeiru too iha fatin akontese iha parte loraik nee, iha neebe ekipa konsege lori sai vitima nia isin husi lagoa, maibe ho kondisaun la salva.
“Informasaun seidauk hotu, pasa mai hotu mak hau foin rejista nia naran Aldeia neebe, ida nee mak sira sei relata mai, tanba iha lagoa ida besik Polisia nian nee, neebe sira informa mai mak hau informa fali,” Komandante Operasaun Autoridade Protesaun Sivil, Munisipiu Lautem, José Agostinho da Costa Pacheco informa ba STL liu husi telefone, Segunda (27/04/2026).
Entretantu dadaun nee ekipa husi Autoridade Protesaun Sivil ho ekipa bombeiru Munisipiu Lautem kontinua rekoilha informasaun kona-ba insidente refere.
(tom)
