DILI, STLTIMORLESTE.com – Eskola hirak neebe mak too agora sei falta livru, mak Ministériu Eduksaun (ME) husu eskola atu halo pedidu ba ministériu refere.
Dehan Diretor Nasional Ensinu Sekundariu iha ME, Benjamin Gomes da Cruz Fernandes ba STL iha nia knaar fatin, Tersa nee (28/04/2026).
“Bainhira ita nian eskola sekundariu neebe mak sei falta livru, husu sira halo pedidu mai iha ministériu, atu nunee husi parte Diresaun Kurrikulu ninian bele halo distribuisaun ba ita nian eskola sira, nee husi dirijente kada eskola ida-idak, liu-liu ita nian eskola neebe sei menus livru, no husi sira atu jere didiak livru neebe iha ona biblioteka iha ita nian eskola sira,” dehan nia.
Iha fatin seluk, Diretor Eskola Sekundariu Jeral nu. 4 Setembru Balide, Sergio A. da Cruz hatete, sira iha biblioteka, maibe livru ba disiplina too agora sei falta, kada loron estudante sira asesu livru hirak neebe mak rai iha biblioteka hodi sira bele lee no balun impresta lori ba uma, depois lori fali mai iha eskola.
“Ami iha biblioteka, maibe livru ba disiplina too agora sei falta, kada loron estudantes sira asesu livru hirak neebe mak rai iha biblioteka hodi sira bele lee no balun impresta lori ba uma, depois lori fali mai iha eskola,” katak nia.
Nia parte husu atu governu liu husi Ministeriu Edukasaun (ME) bele apoiu livru ba disiplina balun neebe seidauk iha, agora ba disiplina hira mak seidauk iha, nee presiza konfirma ho ema neebe toma konta ba iha biblioteka ninian, maibe livru seidauk kompletu.
Nunee mos Diretor Eskola Sekundáriu Nobel da Paz, Jeremias P. de Jesus dehan, Eskola Nobel hanesan eskola privadu, tanba nee sempre husu apoiu ba Ministeriu Edukasaun liu husi Edukasaun Munisipiu, tanba sira iha biblioteka eskola, maibe livru sei menus, nee mak hanesan português, disionariu, no livrus seluk tan.
“Ami nian eskola hanesan eskola privadu, tanba nee sempre husu apoiu ba Ministeriu Edukasaun liu husi Edukasaun Munisipiu, tanba sira iha biblioteka eskola, maibe livrus sei menus nee mak hanesan português, disionariu, no livrus seluk tan,” nia dehan.
(jac)
