BAUKAU, STLTIMORLESTE.com – Ministeriu Koordenador ba Asuntu Ekonomiku (MKAE) liu husi Unidade Estratejika ba Asuntu Economiku realiza programa divulgasaun nasional kona-ba Timor-Leste (TL) nia pos adezaun ba Organizasaun Mundial Komersiu (OMK) iha Munisipiu Baukau.
Koordenador Unidade Estratejika Integrasaun ba Asuntu Ekonomiku, Leoneto Soares de Jesus aprezenta, objetivu husi divulgasaun nasional hola parte iha komprimisiu adezaun TL nian ba OMK neebe nia prosesu tomak ofisializa ona iha loron 30 Agustu 2024 hodi TL legalmente sai membru plenu OMK. Tanba nee MKAE iha nia knaar tomak liu husi Unidade Estratejika ba Asuntu Ekonomiku halo divulgasaun iha territoriu nasional hodi Autoridade Suku, Postu, no entidades sira seluk intende komprimisiu TL nia adezaun ba OMK, neebe nia periodu hahu husi tinan 2024-2030
“Ita mai iha nee aprezenta saida mak ita sei halo durante periodu ida nee too 2030. Komprimisiu ita nian inklui mos ho legislasaun sira neebe ita prezisa aprova iha Konselhu Ministru balu iha Parlamentu Nasional,” Koordenador Unidade Estratejika Integrasaun ba Asuntu Ekonomiku, Leoneto Soares de Jesus hateten ba jornalista sira hafoin remata atividade divulgasaun iha salaun Sentru Konvensoens Vila Antiga Baukau, Tersa (28/04/2026)
Nia sublinha, TL nia adezaun ba OMK iha komprimisiu 21 no dadaun Governu TL aprova ona lei no regulamentu 4 mak hanesan kompetisaun negosiu, promosaun exportasaun no seluk tan, maibe sei falta lei no regulamentu hamutuk 17 neebe mak seidauk hetan aprovasaun.
Nia fo razaun, lei no regulamentu hamutuk 17 neebe Governu TL seidauk aprova, tanba tuir regras lei no regulamentu sira aprova tuir periodu bazeia ba Pos Adezaun TL ba OMK tinan 7.
“Pontu importante husi ida nee mak ita hakarak parte hotu atu hatene ita nia adezaun ba OMK, nunee ita enkoraja setor privadu sira ativu liu tan oinsa kontribui kreximentu ekonomia nasional,” Leoneto Soares de Jesus enkoraja.
Iha fatin hanesan, Sekretariu Munisipal Asuntu Planenamentu Dezenvolvimentu Integradu Baukau, Eduardo Filipe Ximenes rekonhese, TL adopta merkadu livre no dadaun adezaun ba OMK no ASEAN iha neebe sei mosu kompetisaun negosiu, tanba nee husu setor privadu sira atu prepara aan hodi kompete iha merkadu refere.
“La kleur tan ita sei tama dezentralizasaun, ema barak sei mai investe, ita hanesan empreza lokal tenke prontu kompete ba ida nee,” Eduardo sujere.
Enkuantu Prezidente Asosiasaun Emprezarial Mulheres Timor-Leste, Ana da Conceição Ribeiro argumenta, empreza lokal Baukau oan mesmu balu foin hahu ho kapasidade finanseiru kiik, maibe preparadu atu kompete iha atividade negosiu lokal.
“Nuudar setor privadu ami sei prepara aan diak liu tan atu kompete ho nasaun dezenvolvidu iha parte ASEAN, maibe ita labele haree liu ba exportasaun, maibe ita atende uluk lai iha rai laran,” katak Ana da Conceição Ribeiro.
Entretantu programa divulgasaun neebe realiza iha Dalaun Sentru Konvensoens Vila Antiga Baukau nee, hetan partisipasaun masimu husi emprezariu lokal sira, Autoridade Postu no Suku, inklui estudante sira.
(tom)
