DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial MA, tanba komete krime hasoru lezadu inisial AMF.
Iha indisus katak, loron 04 fulan Maiu 2022 iha Hera, Acanunu, Dili, iha dadersan tuku 10:00 OTL, arguidu ba iha lezadu nia uma hodi koalia ka bosok lezadu katak, nia kaer projetu 10 kona-ba uma kbit laek (UKL) iha Aileu.
Bainhira koalia tiha ho lezadu, nunee arguidu mos promete ba lezadu katak, nia atu aluga lezadu nia kareta kamioneta kinur ida ho numeru matrikula 56.856.TLS hodi halo servisu iha Aileu.
Iha sorumutu entre arguidu ho lezadu, nunee arguidu promete ba lezadu katak,nia sei aluga kareta kamioneta lezadu nian nee, kada fulan ho montante $ 1.000,00.
Tanba lezadu mos fiar ona ho promesa neebe mak arguidu hateten, nunee lezadu mos entrega nia kareta nee ba arguidu atu uza hodi halo servisu, no kareta nee mos ho kondisaun diak hela.
Bainhira arguidu uza tiha kareta refere, liu tiha tinan ida, fulan tolu 15 meses, lezadu tenta hodi buka tuir arguidu atu selu lezadu nia osan, maibe arguidu sempre desfia ka bosok lezadu.
Ho arguidu nia bosok nee, halo lezadu hetan prejuizu $15.000,00 no too ikus mai lezadu ba buka arguidu too iha Aileu, atu foti fali nia kareta, maibe arguidu uza kareta refere halo aat tiha no la iha responsabilidade ba prejuizu sira nee.
Konsekuensia sira husi arguidu nia hahalok (bosok) nee mak halo lezadu hetan prejuizu neebe mak sita ona iha leten.
Arguidu, halo ho forma livre, deliberada no konsiente, hatene momos (ben sabendo) katak, uza projetu ho naran UKL, hodi bosok lezadu, nunee lezadu bele fo nia kareta kamioneta ida ba arguidu atu uza hodi servisu iha Aileu, maibe too ikus mai la iha rezultadu, nunee fo prejuizu ba lezadu, hanesan meius ou instrumentu ida neebe mak aptu no adekuadu. Tanba nee arguidu MA, hanesan autoria material ba pratika krime Burla Agravadu, previstu tuir artigu 266 husi Kodigu Penal.
Hatan ba akuzasaun nee, arguidu MA deklara katak faktus sira nee balun loos no balun sala.
Arguidu konfesa katak, faktus la loos mak iha loron 4 fulan Marsu tinan 2022 laos iha loron 4 fulan Maiu tinan nee, mak arguidu ho lezadu hahu halo kontratu hodi aluga lezadu nia kareta.
Arguidu dehan, arguidu ba foti kareta nee, tanba lezadu mak kontaktu arguidu, tanba nee arguidu ba iha lezadu nia uma hodi koalia kona-ba aluga kareta.
Arguidu esplika, lezadu fo tiha kareta iha lezadu nia uma Hera, no kareta kondisaun la diak tanba nee arguidu lori ba iha bengkel hodi hadia. Arguidu deklara kona-ba faktus sira seluk nee loos hotu kedas.
Arguidu deklara, arguidu aluga kareta tanba arguidu kaer projetu 10 kona-ba uma kbit laek nia iha Munisipiu Aileu, tanba nee arguidu hakarak aluga lezadu nia kareta, maibe arguidu lori too iha tinan ida ho ualu kareta kondisaun la diak ona, tanba nee arguidu kontaktu kedas lezadu maibe lezadu la simu ka la responde.
Arguidu esplika, kareta kondisaun aat, tanba nee arguidu deside para deit iha dalan no la iha ema ida mak hein, tanba arguidu okupa ba nia projetu. No liu tiha fulan ida resin mak foin nia lezadu buka arguidu, maibe tauk halai tanba lezadu ba ho membru militar sira.
Arguidu dehan, arguidu kombina malu ho lezadu liu hosi verbal, tanba nee arguidu aluga kareta kada fulan ida sei selu osan $1.000, maibe kareta nia kondisaun la diak arguidu uza fulan ida ho ualu deit, nunee arguidu lakoi selu too agora.
Arguidu dehan, antes arguidu foti kareta, arguidu haree kareta nia kondisaun la diak ona, tanba nee iha momentu nee kedas arguidu lori ba hadia iha ofisina Kuluhun hanesan kareta nia makako, tali dam, troka roda haat mak ho nia total osan hamutuk $1.089, no depois arguidu hadia hotu, arguidu lori ba foho maibe uzaa la kleur kareta aat fali ona.
Arguidu dehan, iha kontratu nee bainhira kareta aat lezadu mak sei hadia, no kareta nee arguidu mak sei lori rasik hodi tula rai henek ba projetu 10, maibe dadauk nee kareta kondisaun la diak para deit ofisina, tanba arguidu seidauk iha osan atu ba selu. Tanba nee arguidu husu ba lezadu atu fo tempu ba arguidu atu troka fali kareta.
Nunee Lezadu AMF deklara katak iha momentu nee, lezadu atu ba Lekidoe iha Munisípiu Aileu no arguidu mak lori kareta Angunan no iha kareta laran mak arguidu husu ba lezadu katak, se lezadu nia kareta iha arguidu atu aluga, tanba arguidu kaer projetu 12 kona-ba uma kbiit laek nia iha Munisípiu Aileu.
Lezadu deklara, iha kontratu nee arguidu atu aluga kareta kada fulan ida aluga osan $1.200, maibe lezadu deside katak kada fulan ida arguidu aluga osan $1.000. No bainhira kareta nia kondisaun la diak, lezadu bele tau osan hamutuk hodi hadia kareta nee.
Lezadu dehan, se ba hadia iha ofisina entaun ema ida responsabiliza $500, entaun arguidu mos konkorda hodi aluga kareta nee.
Lezadu deklara, kareta sai hosi uma nee kondisaun diak hela, maibe dala ruma aat iha dalan klaran, maibe arguidu la kontaktu ba lezadu. Bainhira lezadu sira halo uma Lisan iha Lekidoe iha Munisípiu Aileu, mak lezadu kontaktu ba arguidu maibe arguidu hatan katak kareta kondisaun aat kuaze tinan ida resin no dadauk nee para deit iha dalan.
Tanba nee lezadu husu ba arguidu atu troka fali lezadu nia osan hamutuk $25.000, tuir kareta nia folin.
Rona tiha lezadu, Tribunal adia ba loron seluk.
Audiensia Julgamentu nee prezide husi Juiz kolektivu José Gonçalves, Jumiati Freitas no Juiz Estajiariu. Ministeriu Publiku reprezenta husi Prokurador Luis Hernani Rangel. Arguidu hetan asistensia legal husi Defensor Públiku Henrique Mariz.
(ter)
