DILI, STLTIMORLESTE.com – Komandante Unidade Patrolhamentu Fronteira (UPF), Superintendente Xefe Polísia Calisto Gonzaga promete sei servisu hamutuk ho komunidade Bobonaro, liu-liu Postu Batugade no Tentara Nasional Indonesia (TNI) inklui Polisia Republika Indonesia (Polri) atu proteje linha fronteira husi atividade ilisitu.
DILI, STLTIMORLESTE.com – Komandante Unidade Patrollamentu Fronteira (UPF), Superintendente Xefe Polisia Calisto Gonzaga promete sei servisu hamutuk ho komunidade Bobonaro liu-liu Postu Batugade no Tentara Nasional Indonesia (TNI) inklui Polisia Republika Indonesia (POLRI) atu proteje linha fronteira husi atividade ilisitu.
“Hau hanoin rotasaun ida instituisaun halo nee rotasaun ida neebe mak ambitu instituisaun tenke ser merese halo duni i hau nia prezensa iha ida nee ba laos atu halo buat ruma neebe mak foun, nee kontinuasaun tanba ita-nia misaun iha neebe para atu bele asegura fronteira hodi proteje ita nia sidadaun sira hodi bele mos fo asistensia, defeza, no mos seguransa ba soberania estadu,” hatete Komandante UPF, Superintendente Xefe Polísia Calisto Gonzaga ba jornalista sira iha Komandu Jerál PNTL, Kaikoli, Dili, Tersa (28/04/2026).
Nia dehan, semana oin sei hahu halo vizita ba postu polisia UPF nian iha fronteira sira hodi haree kondisaun.
“Maibe hau hatene inkonsional, fasilidade balun neebe mak presiza tau matan ida nee mak hau informa ona ba Komandante Jeral, iha hau nia primeira semana, maibe parese iha tempu badak ita sei halo vizita hahu husi Suai Maliana too fali Oekusi, nunee dadus neebe mak ita aprezenta ba Komandante Jeral dadus neebe mak real no dadus neebe mak presiza tau atensaun,” nia esplika.
Nia rekonhese katak, Komandante Jeral mos bolu ona nia iha semana kotuk hodi koalia konaba asuntu inkonsional postu UPF iha fronteira no Kompanhia destakamentu sira UPF nian iha fronteira neebe inkonsional hodi nunee bele fo prioridade ba oin bele hadia hodi fasilita membru sira nia servisu.
“Tanba ita atu empenha servisu diak presiza mos iha kondisaun no fasilidade neebe diak, fatin neebe diak atu nunee ita halao servisu neebe diak”, nia informa.
Nia hatete, Ministeriu Interior (MI) antes konstrui ona postu UPF hamutuk 40 resin no agora konstrui tan postu UPF 5.
“Agora dadaun empreza halo hela reabilisaun no balun hahu halo ona faze mobiliariu hatama ona kama, kulsaun atu kompleta ida nee, kuandu hotu ona hau aprezenta ba Komandante Jeral atu bele inagura i ita bele uza fatin sira nee hodi halo servisu,” katak nia.
Komandante nee hatutan, atu kontrola fronteira ho diak mak presiza postu Unidade Patrollamentu Fronteira no rekursu umanu neebe atu koloka iha postu nee.
“Ita boot sira hatene ita falta de rekursu, ita halo postu tenke ser iha ema para atu hein, tanba nee mak hau aprezenta ona asuntu ida nee ba Komandante Jeral katak ita presiza ema para aumenta, kuandu postu foun sira neebe mak iha tempu badak sei entrega,” nia argumenta.
Nia salienta, iha nia proposta nee nia husu efetivu nain 100 resin atu koloka iha postu kompanhia UPF nian no koloka mos ba iha postu foun UPF sira, maibe prefere liu hein rekrutamentu neebe Governu sei halo nee, nunee bele reforsa sevisu seguransa iha fronteira.
“Iha postu ida koloka ema nain hira-hira nee mais tekniku, maibe importante ita-nia ema para atu koloka,” nia afirma.
Gonzaga dehan, tuir dadus neebe nia iha katak efetivu Unidade Patrollamentu Fronteira iha nee iha 300 resin, maibe efetivu sira nee insufisiente tanba UPF iha kompanhia haat.
“Ita boot sira la too iha neeba, mas pelotaun ida labele kompanhia ida, imi hatene ona tenke minimu ema 100, ita bele presta ho modelu kompanhia, presta ba pelotaun ba seksaun neebe nia bele iha postu sira. Neebe ita presiza ema”, nia dehan.
Komandante UPF nee hateten, Postu UPF foun neebe Governu haruka nee iha Maliana, Kovalima. no Oekusi.
“Hau hanoin tinan nee entrega. Tanba balun tama ona fasilidade mobiliariu depois instalasaun ahi hotu, konserteza ita husu autorizasaun entrega,” nia afirma.*
(jen)
