DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial HS, tanba komete krimi hasoru minoridade lezadu inisial EFL.
Iha sala julgamentu laran, Juiz prosesu Jumiati Freitas deklara katak, krime Ofensa Integridade Fisika Simples (OIFS), lei fo dala atu halo tentativa konsiliasaun molok hakat ba iha julgamentu.
Iha tentativa konsiliasaun nee, lezadu minoridade tanba nee reprezentante legal iha kazu konkretu, mak lezadu nia inan.
Iha sala julgamentu laran lezadu nia inan deklara katak, ba prosesu ida nee sira hakarak dada fila, tanba arguidu ba iha prosesu nee, Tribunal notifika la hetan nia paraderu, aleinde Polisia buka mas la hetan.
Lezadu nia inan mos hakarak taka prosesu nee, hodi julgamentu labele lao ba oin.
Rona tiha lezadu nia inan, Prokurador Aderito Tilman deklara, kona-ba prosesu ida nee lejitimidade tomak iha lezadu nia liman. Maibe lezadu hakarak dada fila ona, Prokurador husu Tribunal atu homologa prosesu nee.
Rona tiha Prokurador, Defeza Juvinal Dias mos husu Tribunal homologa prosesu nee no absolve arguidu husi instansia.
Ikus mai Tribunal liu husi Juiz Prosesu Jumiati Freitas, deside homologa prosesu nee, no absolve arguidu husi instansia.
Iha provas katak, loron 18 fulan Novembru tinan 2024, tuku 20:00 kalan, iha Aldeia Terra Santa, Suku Madohi, Postu Administrativu Dom Aleixo, Munisipiu Dili, vitima EFL ho kolega sira (Afaldo no Manck) halimar hela petasan.
Arguidu aproxima ba vitima no foti petasan nee. Vitima halerik no hatete ba arguidu atu para no la bele foti ema seluk nia petasan.
Maske nunee, arguidu baku vitima nia ulun ba morru, hodi halo kanek to ran sai.
Arguidu halo asaun hirak nee ho livre, konsiente no deliberadu, maski hatene katak asaun hirak nee bandu husi lei. Arguidu iha intensaun atu afeta integridade fizika no saude vitima, neebe mos akontese duni.
Tanba nee, arguidu hatene katak ninia konduta bandu no punidu husi lei hanesan krime.
Arguidu HS, hanesan autor material no iha forma konsumadu, komete krime Ofensa ba Integridade Fizika Simples tuir artigu 145 husi Kodigu Penal.
Audensia julgamentu nee, prezide husi Juiz Jumiati Freitas, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Juvinal Dias.
(ter)
