DILI, STLTIMORLESTE.com – Kualidade edukasaun la diak liu no la aat liu, tanba edukasaun hanesan prosesu ida no la fasil, maibe tenke esforsu aan para bele hadia kualidade edukasaun.
Tuir Reitor Instituto Superior Cristal (ISC), Sebastião Pereira ba STL iha nia knaar fatin, Kuarta nee (29/04/2026).
“Hau hanoin ita koalia kona-ba kualidade edukasaun, ita bele dehan la diak liu no la aat liu, tanba ita Timor foti iha klaran, laos ita mak liu ema ou ema mak liu ita lae, tanba ita nian produtu neebe remata iha instituisaun ensinu superior nee barak mak servisu ona iha nasaun neebe mak dezenvolvidu, maibe ita hotu-hotu esforsu oinsa mak ita tenke haka’as aan, maske ita nia nasaun nee foin joven, maibe ita esforsu aan nafatin, labele dehan ita nee foin ukun aan,” nia esplika.
Reitor Instituto Superior Cristal (ISC), Sebastião Pereira hatutan, labele dehan TL nee foin ukun aan no kapasidade hanesan nee, tanba edukasaun nee importante teb-tebes, bele mos ho nasaun sira seluk iha ASEAN ninia, tanba buat edukasaun nee hanesan prosesu ida, nee laos fasil, dehan ohin nee tenke sai hanesan ho nasaun seluk, tanba nasaun seluk nee tinan rihun ba rihun, maibe TL nee foin mak ukun aan, maibe oinsa esforsu aan nafatin atu nunee labele hatudu kualidade hanesan nee.
“Hau hanoin kualidade mos agora daudaun hatudu ona kona-ba mundu tomak, nee duni ita nafatin esforsu aan atu nunee bele hadia ita nia kualidade edukasaun iha ita nia rai, nee duni esforsu aan nee importante tebes ba ita,” tenik nia.
Entretantu Reitor Instituto Ciensia Saude (ICS), Leao Borges dehan, nee duni universidade sira iha rai laran, halo esforsu para bele hadia kualidade, oinsa fo kapasitasaun nafatin ninia dosentes sira, ho nunee bele prepara rekursu neebe diak ba iha futuru.
“Atu aposta ba iha kualidade iha ensinu superior nee mak husi Ministeriu Ensinu Superior Siensia no Kultura (MESSK) nafatin fo apoiu ba ita nia universidade sira, ami sei esforsu aan nafatin atu bele aposta ba iha kualidade, nee mak liu-liu ba iha lingua português, tanba agora ita adere ona ba iha ASEAN, tanba nee ami hakarak haree liu ba kualidade, ho nunee ita labele lakon ho nasaun seluk neebe pertensia iha ASEAN ninia,” dehan nia.
Tuir nia, governu liu husi MESSK fo apoiu nafatin ba universidade sira iha rai laran, atu nunee bele hadia kualidade iha ensinu superior, nee mak hanesan fo kapasitasaun ba dosentes sira lingua português ninia.
(jac)
