DILI, STLTIMORLESTE.com – Relasiona ho kazu droga neebe sidadaun Indonezia nain haat (4) no sidadaun Xineza nain ida (1) neebe Polísia Nasional Timor Leste (PNTL) horiseik halo kapturasaun, dadaun nee rejistu ona iha Ministeriu Publiku (MP).
Informa Komandante Operasaun Diresaun Nasional Servisu Investigasaun Kriminal Nasional (DNSIK), Superintendente Asistente Polísia Mouzinho Correia ba jornalista sira liu husi konferensia Imprensa iha salaun Komando Jeral PNTL, Dili, Kuarta (29/04/2026).
“Entaun iha dadersan ita halo detensaun ba sidadaun estranjeiru nain 4, feto rua no mane rua no halo detensaun wainhira konsumu droga, kazu nee ita rejistu ona iha Ministeriu Publiku,” hatete Komandante Operasaun Diresaun Nasional Servisu Investigasaun Kriminal Nasional (DNSIK), Superintendente Asistente Polísia Mouzinho Correia.
Nia deklara, depois iha loraik Diresaun Nasional Servisu Investigasaun Kriminal Nasional (DNSIK) identifika tan atividade droga balun, iha kalan nee realiza tan operasaun hodi halo detensaun ba sidadaun mane ida tanba komete droga ilisitu iha rai laran.
“Kazu rua neebe la hanesan ho suspeitu neebe la hanesan, sidadaun nain 4 nee husi nasaun vizinhu Indonezia, sidadaun mane ida seluk nee husi Xina, no kazu rua nee iha hotu ona Ministeriu Publiku (MP), no iha loron ida ka rua bele submete ba primeiru interogatoriu,” nia informa.
Superintendente Asistente Polísia Mouzinho Correia deklara, halo ona ezame ba droga nee no deteta katak droga ho tipu Fentanyl, nee droga ida neebe laos foun.
“Fantanyl nee ita boot sira hatene katak, nee laos droga foun, maibe droga ida nee perigozu teb-tebes, wainhira ema konsumu mil gram ida deit bele oho ema barak wainhira ema konsumu liu nia dosis neebe iha, tanba nee presiza atensaun ba joven no ema hotu-hotu iha Timor laran tomak katak, daudaun nee droga sira neebe ho risku boot nee balun komesa tama ona rai laran, ita presiza kuidadu atu nunee labele envolve ba kazu neebe relasiona ho droga,” nia hatutan.
Observasaun STL iha terenu katak, PNTL liu husi Ekipa Konjuta Kompostu husi Diresaun Servisu Investigasaun Kriminal (DSIK), Servisu Nasionál Itelijénsia (SNI) ho Servisu Informasaun Polisia (SIP) kaptura sidadaun estranjeieu nain lima (5) neebe halao hela atividade tranzasaun ilisitu droga iha Dili Laran, no dadaun nee sei iha prosesu investigasaun nia laran.
Sidadaun estranjeiru hirak nee kompostu husi sidadaun Xina nain ida ho inisial CF, nomos sidadaun Indonezia nain haat hoinsial S, IP, YM, AF no sidadaun sira ekipa konjuta kaptura iha area Comoro no Akadiru-Hun.
Tuir informasaun neebe jornalista STL asesu iha terrenu katak, iha loron Segunda feira nee (27/04/2026) maizumenus tuku 07.00 OTL dadersan, ekipa halo operasaun too tuku 02.00 madruga hodi kaptura sidadaun hirak nee no hafoin kaptura ekipa lori kedas ba iha Diresaun Servisu Investigasaun Kriminal Nasional hodi halo investigasaun no detensaun.
Enkuantu kazu nee rasik rejistu ho Numeru NUC ruahanesan 153/26 PNSIK no NUC 155/26 PNSIK. Kazu nee rejistu rua tanba tanba ekipa kapturasaun sidadaun la hanesan no fatin la hanesan. Relasiona ho kazu nee, Komando Jeral PNTL seidauk fo informasaun tanba sei kontinua ho investigasaun.
(jen)
