BAUKAU, STLTIMORLESTE.com – Trabalhador Timor oan neebe halao servisu iha Tasi Timor parte Kosta Sul nian hetan tan peska ilegal husi sidadaun Indonezia besik nain 10.
Trabalhador Timor oan neebe daudaun halao servisu iha Tasi Timor area Kosta Sul, Galiano Waidau aprezenta, durante nia parte halao servisu iha kompanhia neebe kontratu husi Autoridade Nasional Mineral halao survey ba mina iha Tasi Timor, kuaze hetan ona ro hamutuk unidade 20 resin no iha loron loron 29 Abril, parte kalan hetan tan ro tolu husi Indonezia halao peska ilegal iha Tasi Timor.
“Enfelizmente tuku 21:00 atu ba tuku 22:00 OTL ami hetan ro tolu, ro rua mak ami ba besik halai ses tiha neebe ami la konsege hasai foto no video, ro ida mak ami konsege hasai foto no video hau posting iha Facebook nee,” Trabalhador Timor oan Galiano Waidau informa ba STL liu husi telefone, Kinta (30/04/2026).
Nia sublinha, ro ida neebe sira toman hodi hasai fotografia no video deteta ro refere utiliza husi sidadaun Indonezia besik nain 10, tanba nota liu husi konversa neebe ho intonasia/dialetu Kupang, Nusa Tenggara Timur (NTT).
Nia fundamenta, ro ida neebe sira detet ho ema besik nain 10 ho evidensia ikan fresku ho kuantidade barak, tanba nee informa kedas ba parte seguransa, maibe la konsege halo kapturasaun, tanba kestaun distansia.
“Enfelizmente ita iha koneksaun ho ita nia Autoridade Seguransa, informasaun ita fo maibe ita mos konsiente katak, ita nia seguransa sira nee labele lao too iha nee, tanba nee laos rai maran para sira kareta mai lalais,” Galiano Waidau akresenta.
Entretantu too notisia nee publika, STL seidauk hetan konfirmasaun husi Autoridade Unidade Polisia Maritima.
(tom)
