DILI, STLTIMORLESTE.com – Grupu husi Asosiasaun Habelar Matenek ba Moris Saudavel (HAMMOS) relata atividade neebe sira halo durante nee, liga ho tratamentu ba komunidade ba Prezidente Republika Jose Ramos Horta.
Bainhira remata hasoru malu, mediku jeral hanesan Prezidente Ezekutivu HAMMOS, Bonifacio da Silva de Jesus ba jornalista iha palasiu Prezidensial Nicolau Lobato, Bairo Pite, Kinta (30/04/2026) hatete, ohin mai relata atividade neebe sira halo durante nee ba Prezidente Republika Jose Ramos Horta no husu mos prezidente nia apoiu ba sira.
“Ami husi asosiasaun ida naran HAMMOS, ami asosiasaun ida neebe mesak ema voluntariu deit kompostu husi mediku sira parteira infermeiru, Infermeira Framasista inklui tekniku aliadu sira neebe ho espiritu voluntariu durante nee halo hela atividade apoiu ba servisu saude nia ba apoiu konsulta iha area rural inklui ami nia papel ida importante liu mak fahe imformasaun sira konaba saude liu liu moras sira neebe aas iha ita nia rai, no ami fokus liu ba eskola nomos joven sira atu hasae joven sira nia kapasidade atu komprede diak moras sira liu liu oinsa halo prevensaun ba ema idak idak, entau ohin ami mai hasoru sua Exelensia Prezidente Republika atu aprezenta hela ami nia ezistensia hanesan asosiasaun nomos aprezenta atividade sira neebe durante nee ami halo iha terenu, atu nunee karik iha mos oportunidade ruma hetan apoiu husi exelensia, nunee ami bele kontinua ami nia atividade ho forma voluntariu ba oin,” dehan nia.
Nia hatete, sira iha atividade rua neebe importante, ida mak haree liu ba edukasaun ba estudante sira liu liu ba moras sira hadaet husi asediu seksual, saude reprodutivu, moras infeksaun sira hanesan dengue, TBC inklui mos moras kroniku lahadaet hanesan raan midar ho tensaun, halo atividade nee atu hasae sira nia estudante sira nia koinesementu atu sira komprende no hatene sira bele kontinua fahe fali ba sira nia kolega sira inklui sira nia familia.
“Atividade segundu mak halo konsulta jeral ita ba munisipiu alende ita fahe imformasaun sir aba eskola sira ita aproveita mos fo atendementu konsulta jeral, inklui konsulta ba moras sira neebe iha ita nia rai neebe frekuenta moras tensaun moras sira neebe infeksaun respiratoriu inklui mos ita hetan apoiu husi ita nia parseru sira neebe durante nee apoiu ami hanesan Maluk Timor, sira seluk tan neebe mak apoiu ami atu ba fo konsulta no leno ita nia maluk sira halo skang ba ema sira problema fuan leno ba inan isin rua sira atividade sira nee mak durante nee ita halo,” katak nia.
Nia hatutan tan katak durante nee sira halo ona tratamentu ba komunidade iha munisipiu Ainaro, Manatutu, Likisa, Oecusse no Aileu, no semana kotuk halo tratamentu ba komunidade ba komunidae iha Dare fo konsulta jeral ba komunidade iha Aldeia Lelaos.
Nia akresenta tan katak, durante halo tratamentu moras neebe sira identifika numeru aas mak ISPA, alende nee iha moras seluk hanesan diaria.
Organizasaun nee eziste iha 2018, maibe fofoun halibur malu hanesan bolu malu fahe koinesementu ba eskola ikus gradua ona harii ona asosiasaun.
Nunee mos medikamentu neebe sira uza hodi halo tratamentu ba komunidade nee sira buka apoiu husi organizasaun neebe apoiu sira uza sosa aimorok hodi atende pasiente sira,
Iha biban nee Prezidente Republika Jose Ramos Horta apresia ho Grupu Asosiasaun HAMMOS nia serbisu neebe durante nee sira halo ona hodi tulun komunidade sira, iha biban nee Prezidente Republika mos fahe nia esperensia durante vizita komunidade sira presiza duni hetan atedementu hanesan nee.
Prezidente hatete, saida mak sei apoiu la promete maibe ida neebe mak bele apoiu Prezidente sei buka atu fo apoiu.
(eme)
