DILI, STLTIMORLESTE.com – Ekipamentus ba estudantes fakuldade saude husi Instituto Superior Cristal (ISC)sufisiente hela, nunee estudantes sira bele halo pratika iha laboratoriu.
Asuntu nee hatoo husi Reitor ISC, Sebastião Pereira ba STL iha nia knaar fatin, Kinta nee (30/04/2026).
“Hau hanoin too agora estudantes iha area saude ninia neebe mak remata ona estudu nee hira, nee ita presiza konta lai, atu nunee ita bele hatene ninia dadus nee nain hira. Ekipamentus iha mak ita loke fakuldade saude nee, tanba nee ami nian ekipamentus nee sufisiente ba ami nian estudantes sira,” nia esplika.
Nia dehan, fakuldade saude iha ISC nee ninia departamentu tolu, nee mak hanesan departamentu parteira, infarmajen no departamentu fisioterapia, kona-ba pratika nee depende ba semester III pratika, nee halo pratika iha hospital nomos pratika iha laboratoriu, bainhira halo pratika iha laboratoriu liu mak bele ba iha hospital, la liu nee labele ba.
“Aleinde estudantes sira simu teoria, nunee mos halo pratika, tanba nee ami nian estudantes sira depois de simu teoria nomos halo pratika, tanba area saude nee estudantes sira tenke halo duni pratika,” katak nia.
Nunee mos Reitor Instituto Ciência Saude (ICS), Leao Borges dehan, estudantes sira presiza uza oportunidade nee ho diak, liu-liu ba iha pratika no teoria ninia, atu nunee bainhira remata estudu bele aplika iha fatin neebe mak sira hetan servisu, nee presiza aplika ho diak, tanba sira simu ona teoria, nunee mos halao pratika ba area neebe mak sira idak-idak hili ona.
“Kona-ba estudantes sira halao pratika nee depende ba iha orariu, tanba orariu pratika nian nee ita nian estudantes sira tenke halo duni pratika, teoria nian nee estudantes hotu simu teoria, depois mak halao pratika, nee ba departamentu lima neebe mak agora daudaun eziste hela iha ICS,” nia informa.
Nia hatutan, estudantes sira nee laos simu deit teoria husi dosentes sira, maibe depois de simu teoria, sira mos halao pratika, atu nunee estudantes sira nee bele kompriende diak ba area neebe sira hili ona, balun iha area parteira, infarmajen, farmacia, nutrisaun no seluk tan, departamentu lima nee estudantes sira halo hotu pratika.
(jac)
