DILI, STLTIMORLESTE.com – Ministeriu Publiku (MP) iha alegasaun ba krime Arma Branka no Ofensa Integridade Fizika Simples (OIFS), solisita ba iha Tribunal Koletivu atu kondena arguidu ho inisial JdC hanesan laen, tanba komete krime hasoru lezada insial AL hanesan feen boot.
Iha sala julgamentu laran Prokurador Prosesu Napoliao da Silva deklara katak, arguidu nia aktu prienxe ba iha elementu husi krime Arma Branka, tanba momentu neeba arguidu kaer hela katana ida hodi halo lezada tauk.
No aktu ba krime OIFS mos prienxe, tanba arguidu halo agresaun hasoru lezada.
Tanba nee MP konklui katak, faktus provadu arguidu komete krime neebe MP akuza, tanba nee MP solisita ba iha Tribunal Koletivu atu kondena arguidu ho pena prizaun tinan 2, suspende ba tinan 2.
Enkuantu husi parte defeza nian, Jose da Silva haree katak, arguidu konfesa imparsial ba faktus, tanba nee husu Tribunal tetu atu aplika pena neebe justu ba arguidu.
Rona tiha alegasaun, Tribunal adia ba loron seluk hodi rona desizaun.
Iha indisus katak, problema nee akontese iha Tasi-Tolu, momentu neeba lezada kaer toman arguidu chat ho feto seluk. Tanba nee lezada screnshot tiha mensajen nee hodi tau iha lezada nia telefone. Maibe ikus mai arguidu foti lezada nia telefone hodi hamoos fali mensajen nee, mak mosu diskusaun entre arguidu no lezada too kria problema.
Katak oras nee daudaun arguidu moris hamutuk ona ho feto kiik, lezada hanesan feen boot halimar hodi haree deit sira nia oan.
Konsekuensia husi arguidu nia hahalok halo lezada sente moras, tanba nee MP akuza arguidu komete krime Arma Branka no OIFS.
Audensia julgamentu nee prezide husi Juiz Jose Escurial, Fransisca Cabral, Juiz estajiadu nain ida, MP reprezenta husi Prokurador Napoliao da Silva, arguidu hetan asistensia legal husi Defensor Publiku Jose da Silva.
(ter)
