ERMERA, STLTIMORLESTE.com – Realidade moruk hanesan kafe moruk Ermera oan sira nian, transforma tiha ona dezenvolvimentu iha munisipiu nee sai hanesan drama triste la iha rohan. Bainhira ukun nain sira neebe tur iha kadeira luxu Díli nian hanoin deit katak, estrada labele halo lalais hanesan prepara “Pop Mie,” maibe iha terrenu povu Ermera luta ho iis no kosar, hodi dudu kareta sira neebe mout iha tahu laran neebe klean hanesan mota.
Lia fuan ka retorika husi ukun nain sira neebe tenta justifika kuakidade obra ho lojika hahan instanre, hamosu fali laran kanek no hakanek fali dignidade komunidade nian. Iha drama neebe povu hasoru agora, lojika nee la serve ona, tanba estrada barak fakar ona osan millinaria nee mak naben hanesan hahan instante, hodi nakdulas hotu bainhira udan tau uituan deit.
“Sira (ukun nain) iha leten hanoin deit Pop Mie, maibe sira labele haluha katak ami mak loron loron soke ho tahu dodok iha nee. Karreta sira neebe mout ba tahu laran nee sasin katak, sira nia planementu ho realidade iha baze la hanesan duni,” dehan Motorista ida ho naran Gaspar da Cruz Salsinha ho lian hirus, bainhira dada lia ho STL iha Ermera, Sabadu nee ( 02/05/2026).
Ihs Gleno ba Ermera Villa no area sira seluk la presiza buka evidensia falhansu dezenvolvimentu. Karreta sira mout ka soke iha tahu laran mak sasin neebe moris ba realidade nee.
Tanba Motorista sira laos ona lori karreta maibe sira luta hasoru tahu. Kustu manutensaun sae makas, no pasa jeito sira mak sai vitima hodi selu transporte neebe karun.
Nuudar pilar prinsipal ekonomia kafe nian iha rai laran, Ermera sente todan hodi transporte produtu ba sidade. Povu kestiona tanba sa mak rai riku neebe kontribui boot ba kofre Estadu fali mak hetan estrada neebe aat makas.
Komunidade sira laos ona simu retorika kualdade presiza tempu. Sira kestiona seriadade Governu nian hodi fiskaliza kompahia neebe manan kontratu millinariu, maibe husik estrada nakfilak ba tahu laran.
“Ami la husu estrada neebe hotu iha kalan ida, maibe ami husu seriedade. Keta hanoin deit Pop Mie hodi subar imi nia falhansu. Se estrada milhaun ba milhaun iha tanba sa mak estrada paradu hela seit husik karreta sira mout ihs tahu laran,” kestiona Komunidade Ermera, Antonio Soares.
Ho lian hirus uituan komunidade nee dehan, ukun nain sira bele goza sira nia kafe Ermera neebe midar iha Dili, maibe keta haluha katak kafe nee mai husi povu neebe “Hemu Hela Tahu” no terus loron loron iha estrada. Para ona hanoin kona-ba Pop Mie, tanba povu la presiza hahan instante povu presiza dignidade no asaun konkreta. Too bainhira mak drama Pop Mie nee remata, no estrada diak bele mosu, tanba povu Ermera hein resposta laos retorika mamuk iha diskursu sira.
Entretantu antes nee Ministru Obras Publika ( MOP), Samuel Marcal hatete, kontrusaun estrada iha Ermera sei iha hela prosesu nia laran, tanba nee husu ba komunidade atu nafatin kalma no hein, tanba projetu nee envolve orsamentu boot no tenke tuir kriteria rigorozu husi Banku Mundial.
“Osan neebe uza ba projetu nee mak emprestimu, tenke tuir regra no prosedimentu Banku Mundial nian. Kontratu sira lansa tiha ona, maibe presiza tempu atu liu husi prosesu legal sira inklui Tribunal, no konpanhia mos presiza tempu atu prepara mobilizasaun no ekipamentu, dehan MOP, Samuel.
Nis dehan, kontrusaun estrada labele halo lalais deit hanessn prepara hahan instante hanesan Pop Mie.” Se ita halo lalais tebes hanesan fakar bee manas ba Pop Mie no han kedas, rezultadu sei la diak no bele estraga osan barak. Ita presiza halo estrada neebe diak no dura ba tempu naruk,” hatete Governante nee.
(car)
