DILI, STLTIMORLESTE.com – Timor Leste (TL) kondena ho termu neebe forte liu ba aktu agresaun Iraun nian iha loron 4 fulan Maiu tinan 2026 hasoru Emiradus Arabes Unidus, neebe konstitui dezafiu no asaltu ida neebe makaas hasoru lei internasional no Karta ONU nian.
Prezidente Republika Jose Ramos Horta liu husi mensajen, Kuarta nee (06/05/2026) hatete, Forsa Defeza Emiradus Arabes Unidus nian ho susesu interseta misil balístiku 12, misil kruzeiru 3, no UAV 4. Ida-nee mak atake ida seluk neebe naun provokadu husi Iraun hasoru nasaun Arabe ida neebe la envolve iha funu neebe kontinua entre Israel, Estadus Unidus no Iraun. Asembleia Jeral ONU no Konsellu Seguransa tenke fó sai avizu formal ida ba Iraun atu para atake sira seluk hasoru nasaun sira GCC nian.
Timor Leste hamriik hamutuk ho Governu no povu EAU kontra Iraun nia violasaun repetida ba soberania, independensia no integridade territorial EAU nian.
“Hanesan nasaun ida neebe harii iha cinzas husi okupasaun no triunfu dialogu nian, Timor Leste hatene kustu loloos agresaun nian. Atake sira ba Emiradus Arabes Unidus laós deit asaltu ba nasaun belun ida maibe mós ameasa direta ida ba pas rejional no orden internasional neebe bazeia ba regra sira neebe proteje Estadu hotu-hotu, boot no kiik. Ami husu Iraun atu hapara kedas ninia beligerância no hili dalan ho bom senso. Mundu la aguenta ba konflitu seluk tan neebe mosu iha Golfu,” deklara Prezidente Horta.
Prezidente Republika hatete Timor Leste ezije ba parte hotu atu fila fali ba meza negosiasaun no aproveita oportunidade hotu ba de-eskalasaun. Timor Leste konsistentemente rekonese katak dialogu no rekonsiliasaun mak dalan uniku ba estabilidade no futuru neebe diak liu.
(eme)
