DILI, STLTIMORLESTE.com – Realiza Dili Maratona iha loron 09 Maiu, husi Palasiu Governu, Finansas, Motael, Palasiu Governu, Habibie too ba iha Area Branca-Dolokoan sei taka husi oras tuku 5 dader too tuku 10 dader.
Tuir Prezidente Konfederasaun Desportiva Timor-Leste (CDTL), Afranio Xavier Amaral ba jornalista liu husi konferensia imprensa iha Palasiu Prezidensial Nicoalu Lobato, Bairo Pite, Kuarta nee (06/05/2026) hatoo informasaun ba publiku relasiona ho Selesaun Nasional Dili Maraton liu-liu komunidade iha kapital Dili hatene katak, iha dia 9 Maiu halai korida 21 kilometrus teste ida atu halo preparasaun ba iha 8 Agostu.
“Tanba ida nee mak liu husi biban ida nee ami hatoo informasaun ba publiku katak ita nia rute, tanba rute nee la hanesan ho sira uluk Dili maraton iha 2025 liu ba, maibe iha mudansa rute ida nee, hahu partida husi Palasiu Prezidensia nia oin, liu husi Finansas, Motael, Palasiu do Governu, Ponte BJ Habibie too ba iha Area Branca-Dolokoan,” katak nia.
Nia hatete, too Dolok oan sei fila-fali mai kontinua ho rute neebe hanesan liu husi BJ Habibie mai Palasiu Governu, too iha Palasiu Governu sei kontra tranjitu la fila ba liman karuk maibe liu hosi Hotel Timor nia oin depois remata mai iha Palasiu Presidensia nia oin.
“Ami husu ba ita nia komunidade tomak hahu oras ida neebe mak hahu iha oras 5:00 dader too 10:00 OTL dadersan hamenus no labele halo mobilizasaun iha fatin neebe mak ita nia atleta sira atu halai liu ba.
Nia hatete, Resjitu too ohin loron nee hamutuk 200 ital, komesa aban loraik too bain tolu dadersan sira sei iha oportunidade para simu numeru de dorsal, numeru dorsal nee para dia 9 dadersan hanesan 4 oras sira sei konsentra iha Palasiu Prezidente oin too tuku 6 husik atleta sira halai ba 21 kilometru nian.
“Iha maratona 17 ano mak bele partisipa ida nee hanesan meius ida atu koko rute foun no koko mos selesiona ba ita nia Atleta nasional, atu sai ekipa nasional atu reprezenta Timor iha eventu neebe mak sei akontese iha dia 8 Agostu 2026, ita hotu hatene katak nasaun hotu sei presiza, tanba nee mak ita teste ita nia atleta atu haree ita nia kapasidade no forsa ita nia atleta sira nian atu forma sira durante fulan hira nia laran, atu nunee iha dia 8 agostu sira bele hatudu persepsaun ho diak,” katak nia.
Iha fatin hanesan Superientedente Asistente Roberto Pereira dos Santos, hatete relasiona ho atividade dia 9 Maratona selesaun nasional ninian hosi komandu PNTL, Kuartel Jeral hatun ona diretiva operasaun ba iha komandu Munisipiu Dili ba Unidade espesial nomos apoiu sira hosi sentru formasaun Polisia ninian, para atu bele asegura rute sira neebe maka mensiona.
Katak rute sei hahu hosi Palasiu Prezidensia liuhosi Mejid ninian ba tasi-ibun no kontinua ba volta iha Dolokoan Kristu Rei, depois fila mai too iha Palasiu Governu sei kontra Tranjitu iha nee, kontinua deit mai too iha Mandarin hodi finis iha Palasiu Prezidensia. Tanba nee PNTL preparadu ona, iha ona nia planu rasik atu asegura fatin sira neebe maka sei afeita ba movimentu tranzitu ninia.
“Avizu ba iha komunidade sira, iha loron sabadu karik ita-boot sira laiha atividade urjente, diak liu ita-boot sira hakmatek iha fatin bele mai asiste atividade neebe mak realiza hosi ita nia Prezidensia Republika no Governu, iha Dili Maratona ba selesaun nasional ninian. Neebe iha rute sira neebe mak ami sei taka, mak hanesan iha Palasiu Prezidensia nia oin, iha parte Fatuhada ninian sei taka besik kedas ba iha Mejid ninian sae mai, iha kedas kruzamentu entre Palasiu Prezidente ho Mejid Ninian,” katak nia.
Nia hatete Komunidade sira ho transporte atu liuhosi parte Komoro diak liu too iha Kuartel Jeral F-FDTL ninian bele liu husi dalan alternativa Hudi laran nian, ba iha Dili laran liu too iha Pramuka ninian nee bele hola fali tais market ninian, tanba iha parte area tasi-ibun ninian komesa kedas husi Mandarin, Palasiu do Governu ba too Bidau sei taka.
Entaun rute neebe liu mak iha neeba, klaru engarafamentu sei mosu, karik iha komunidade balu sei halao ninia atividade, dalaruma atividade komersiu sei lao hela.
Atividade nee remata iha tuku 9 entaun dalan sei loke iha tuku 9 ba leten, tanba nee avizu ba iha traballador sira, liu-liu ba iha kompania sira, tenke koopera ho Estadu, atu nunee labele liu iha dalan alternativu, no labele ezije atu tama iha area sira neebe maka Governu deside ona sei taka iha loron Sabadu dia 9 ninian.
Tanba nee ba atividade maratona neebe mak ba selesaun nasional para prepara ba iha loron 8 agostu Dili internasional Maraton ninian, tanba atividade nee laos deit promove desportu maibe ida nee mos ligadu ho promove rain ba iha mundu tomak katak Timor iha paz no estabilidade nia laran, bele promove turizmu.
“Bidau santana no mai iha Bidau Lesidere ida nee mos tranzitu sei block nunee mos ba iha parte ba iha Bairo Formoza nian liga mai iha Palasiu Prezidente nian. Engarafamentu sei makaas tanba nee husu ba komunidade sira diak kumpri oras tolu ou haat nia laran nee deit hakmatek iha uma, ita boot sira mos bele mai asiste iha atividade nee,” katak nia.
Nia hatete, rute sei taka iha tuku 5:00 dadersan, tanba nee iha tuku 5 dader nee la hetan ona movimentu tama iha rute neebe designadu ona.
(eme)
