DILI, STLTIMORLESTE.com – Ministra Edukasaun (ME), Dulce de Jesus Soares ho delegasaun sira husi Comunidade dos Paises de Lingua Portuguesa (CPLP) halao vizita no tau aifunan ba eroi no eroina sira iha semiteriu Santa Cruz.
Vizita nee halao iha Kuarta (06/05/2026), husi Ministra Edukasaun, Dulce de Jesus Soares ho delegasaun simu direta husi Prezidente no Estrutura Comite 12 de Novembro nian nomos familia husi eroi no eroina sira neebe uluk mate iha masakre Santa Cruz iha loron 12 fulan Novembru de 1991.
Biban nee Ministra Dulce hatete, masakre Santa Cruz iha 1991, loron trajiku ida neebe joven timor-oan atus resin lakon sira nia vida, bainhira halo protestu pasífiku ba sira nia direitu ba autodeterminasaun no sai mos símbolu makas ida ba rekuperasaun, reziliénsia no korajen inspiradora husi povu ida neebe mak iha tempu naruk moris iha sofrimentu nia laran hodi ikus hetan independensia.
“Hau agradese tebes ho prezensa prezidente ho estrutura no familia boot Comite 12 de Novembru nian hodi simu delegasaun sira husi CPLP, atu bele fo lembra ita-nia istoria pasadu nian ba delegasaun sira. Ida nee hanesan momentu importante ida atu bele fo informasaun lolos kona-ba masakre santa kruz nian iha tinan 1991 liubá,” dehan Ministra nee iha pajina rede sosial ME neebe STL asesu Kinta (07/05/2026).
Nunee mos Prezidente Komité 12 Novembru, Gregorio Sandanha “Mouris” akresenta, importante teb-tebes ME nia funsionamentu liga ho istoria sira atu nunee bele kontinua existe historia sira konaba luta rai nee nian ba libertasaun da patria husi jerasaun ba jerasaun.
“Hau husu ME atu nafatin haklaken ita-nia istoria sira liuliu ba ita-nia estudante sira, tanba nee hanesan memoria importante ida atu bele konta husi jerasaun ba jerasaun,” tenik Prezidente Comité 12 Novembru nee.
(dom)
