INDONEZIA, STLTIMORLESTE.com – Liu husi komunikadu Media F-FDTL neebe STL asesu katak, Adido Defeza Timor Leste (F-FDTL) ba Indonezia, Koronel Renilde Guterres Corte Real e Silva, akompaña husi Adjunto Adido Defesa 2Ten. Fuzileiro João da Silva Soares halao vizita kortezia b instituisaun edukasaun militár estratejiku iha Indonézia, hanesan Akademia Militár Angkatan Udara (AAU) iha Yogyakarta no Akademia Militár Angkatan Darat (AAD) iha Magelang, Indonézia.
Iha AAU, delegasaun simu husi Marsekal Muda TNI (Marsda TNI) Donald Kasenda, Gubernur AAU ho estrutura ofisial tomak, no iha AAD simu husi Brigadeiro Jenerál TNI Pramungkas Agus, wakil Gubernur AAD ho estrutura ofisial tomak.
Iha vizita nee halao iha ambiente formal no amigavel, hanesan parte husi esforsu hodi reforça relasaun bilateral iha area defeza no Militar.
Objetivu husi vizita nee mak atu halo introdusaun ofisiál no hametin relasaun amizade no konfians mutua entre F-FDTL ho TNI, liu-liu Akademia Forsa Aéro no Forsa Terrestre no habelar komunikasaun institusional, no Harii komunikasaun diak no forte entre lideransa instituisaun defeza rua.
Iha vizita nee Governador AAU hatoo nia apresiasaun ba vizita nee no afirma AAU nia kompromisu no komitmentu hodi apoia kooperasaun entre nasaun rua nee, partikularmente iha area edukasaun no dezenvolvimentu kadete. Nia espera vizita ida nee bele hametin liu tan relasaun diak no besik entre Timor Leste ho Indonésia, partikularmente iha ámbitu Forsa Aérea.
Nunee mos iha AAD, Vise Governador AAD
Mos hatoo ninia aprsesiasaun no Kontente tebes ho vizita nee no Afirma AAD nia kompromisu no komitmento hodi apoiu Kooperasaun entre Nasaun rua, partikulamente iha area Edukasaun Militár Terrestre nian.
Iha pontu importante neebe hatoo husi Adidu Defesa Durante vizita nee mak,Hatoo profunda apresiasaun no agradese husi Ministro Defesa Timor Leste no Xefe Estadu Maior Jenerál F-FDTL.
Depois iha importánsia kooperasaun edukasaun Militár hodi dezenvolve rekursu umanu Militár, Presiza kontinua programa formasaun no treinamentu entre instituisaun rua (F-FDTL ho TNI). Nomos mantein no Hasa’e partisipasaun kadete Timor-Leste iha instituisaun militar Indonézia.
Iha oportunidade hanesan, Adidu Defesa ho Adjunto mos halao enkontru ho kadete Timor oan iha AAU ho naran Expery Jezinho Gomes Raul, neebe halao hela nia estudu iha akademia refere, hanesan mos iha AAD ho kadete Timor Oan nain rua, ho naran Keyduli R.G.J. Carvalho no Giovanino F. D. S. Alves iha akademia Refere.
Enkontru nee permite atu hatene diretamente progresu no desafiu sira neebe kadete sira nee enfrenta, no hatoo mensajen apoiu, orientasaun no motivasaun husi parte F-FDTL no Ministeriu Defesa Timor Leste nian.
Iha vizita ida nee, Adidu Defeza ho Adjuntu hetan oportunidade hodi haree video perfil AAU nian no simu aprezentasaun husi diretor edukasaun AAU nian Koronel Irawan, konaba vizaun jeral Akademia Forsa Aérea no relatoriu edukasaun(Akademiku) kadete Timor oan nian iha Akademia Forsa Aerea.
Nunee mos iha AAD Delegasaun mós halao vizita ba fasilidade edukasaun no treinamentu, inklui sala aula, laboratóriu, Museu AAD, cazerna no área formasaun fisika.
Kadete Timor Oan hirak nee sei gradua Hamutuk ho sira nian Maluk kadete sira seluk (Indonésia Oan) iha Loron 21 Julu iha Istana Negara Repúblika Indonésia, iha Jakarta Pusat.
Atividade vizita no enkontru ida ne’e remata ho troka lembransa nu’udar símbolu amizade no kooperasaun neebe forte entre instituisaun rua husi nasaun rua nee.
Vizita kortezia ne’e realiza ho susesu no atinji objetivu ne’ebé determina, Nakonu ho amizade, sentimentu emosional no kontribui signifikativamente ba reforsu relasaun bilateral no dezenvolvimentu kapasidade rekursu umanu militar Timor Leste, no mos reforsa konfiansa mutua no koperasaun entre instituisaun F-FDTL ho TNI hodi promove paz, estabilidade no seguransa iha rejiaun.
(jen)
