VENILALE, STLTIMORLESTE.com – Prezidente Republika (PR), Jose Ramos Horta promete sei konstrui uma dignu ba idozu António Mira Belo ho nia oan feto no idoza Maria Baptista Guterres ho nia alin iha Aldeia Wai-Tunau, Suku Uma Ana Iku, Postu Administrativu Venilale, Munisipiu Baukau.
Idozu António Mira Belo ho nia feen kaben kous oan mane ida feto rua, iha neebe nia feen kaben no oan feto ida no mane fila hikas ona ba Aman Maromak nia kadunan Santo iha tempu okupasaun Indonezia husik hela idozu ho nia oan feto Felisberta Pereira Belo.
Idozu António Mira Belo atual idade 80 resin ho kondisaun fiziku la pemite ona, tanba labele lao mesak inklui difisiensia tilun no matan. Ho kondisaun hirak nee afeta ba idozu António Mira Belo ho nia oan feto labele harii uma ho kondisaun seguru, nunee obrigadu durante tinan naruk hela deit iha uma neebe taka ho nuu tahan didin ho au la permite tebes ba sira nain rua atu hela, tanba iha tempu udan sira nain rua obrigadu tenke toba deit iha udan laran no alternativu ba sira mak toba uza deit sombrinha.
Iha sorin seluk idoza Maria Baptista Guterres atual idade 76 kondisaun fiziku ema ho difisiensia ain no nia alin Alcina Ximenes de Sousa idade 57 difisiensia liman parte loos, iha neebe sira nain rua hela deit iha uma kondisaun la seguru, tanba oan mane ida neebe Idoza Maria Baptista Guterres kous fila hikas ona ba Aman Maromak nia kadunan Santo.
Husi kondisaun moris sidadaun nain haat (4) hafoin media Suara Timor Lorosa’e no Radio Televizaun Timor Leste publika, halo Prezidente Republika José Ramos Horta preokupa, oriente kedas Asesor Prezidensial Republika Quintiliano Monis too kedas sidadaun nain 4 refere nia fatin hodi apoiu sasan nesesidade bazika sira hanesan fos, mina tein, faru no seluk tan, iha neebe promete, PR José Ramos Horta sei halo uma dignu ba familia rua nee.
“Hodi kalan Prezidente haruka hau mai Baukau haree uma kain rua nee ita bele ajuda uma mahon ruma, maibe primeiru mak koordena ho Autoridade Lokal kona-ba rai estatus nee tenke ser sira nian,” Asesor Prezidensial Republika Quintiliano Monis hateten ba jornalista sira hafoin remata vizita familia rua nee iha Aldeia Wai-Tunau, Sesta (08/05/2026).
Nia sublina, durante ekipa Prezidensial Republika vizita familia vuneravel rua refere koordena mos Autoridade Suku kona-ba estatutu rai neebe pertense ba familia rua refere no orienta Autoridade Suku atu diriji proposta urujente ba Prezidente Republika, nunee prosesu orsamentu ba konstrusaun uma ba familia rua refere.
Nia esplika, uma refere medida matein ho programa konstrusaun uma dignu ba familia vulneravel sira iha territoriu nasional neebe kompleta mos ho fasilidade kompletu inklui oferese atividade negosiu no hakiak animal, maibe depende ba benefisiaria no benefisiariu.
“Planu nee hein Autoridade Suku hateten ona se karik proposta ida ba nai Prezidente aprova ita mai halo,” Quintiliano akresenta.
Iha sorin seluk, Xefe Suku Uma Ana Iku Antoninho da Costa Freitas agradese ba media Suara Timor Lorosa’e no Radio Televizaun Timor-Leste neebe publika ona preokupasaun husi familia vuneravel rua refere too hetan atensaun direita husi Prezidente Republika José Ramos Horta.
“Kona-ba proposta no pedidu Segunda semana oin ami komesa halo ona ho urujentemente, nee ami nia responsabilidade segunda ami halo ona,” Antoninho da Costa Freitas promete.
Enkuantu familia vuneravel Alcina Ximenes de Sousa no Felisberta Pereira Belo espresa sentimentu kontente ho matan been agradese ba apoiu Prezidente Republika neebe iha inisiativa atu konstrui uma ba sira.
Entretantu idozu António Mira Belo ho nia oan feto Felisberta Pereira Belo, hetan ona konstrusaun uma natoon ida husi ekipa Fundasaun Raan Amigo Kariedade (FURAK) neebe naran konesidu Rio Soares, maibe Prezidente Republika sei konstrui tan uma, tanba uma neebe ekipa refere konstrui sei utiliza fali ba dapur, bainhira uma husi PR konstrui ona.
(tom)
