DILI, STLTIMORLESTE.com – Organizasaun Massas FRETILIN OMF husi 28 Agostu 1975 too ohin loron Reorganizasaun OPMT halao ho raan foun ho Lema “Solidariedade Interjerasional Dignifika Pasadu, Inspira Futuru”.
Tuir membru Konselhu Koodenadora Nasional OPMT, Zelia Fernandes ba STL Segunda (11/05/2026) hatete, V Konferensia OPMT sai naroman ba tranzisaun lideransa neebe armonizadu, hodi liga esperiensia veteranu sira nian ho enerjia foin-sae hodi hametin estrutura organizasaun ba luta hasoru injustisa foun.
“liga ho lema konferensia nian hau nian komentariu balun mak nee “Feto foin-sae laos hein tempu, maibe simu responsabilidade husi agora. Solidaridade interjerasional mak xave atu OPMT sai forte liutan hodi defende direitu feto iha baze,” dehan Zelia.
Nia hatete, maske ukun aan ona, luta feto nian seidauk remata. OPMT tenke hamutuk hodi kontra injustisa foun, hanesan violensia bazeia ba jeneru no kbiit ekonomika, liuhusi unidade entre feto veteranu no foin-sae.
V Konferensia OPMT sai momentum istoriku hodi hametin konsolidasaun institusional liuhusi tranzisaun lideransa neebe armonizadu. Fokus prinsipal mak harii feto foin-sae neebe prontu simu responsabilidade ho matadalan husi veteranu sira, hodi hakat ba oin iha luta kontra injustisa foun iha Timor Leste.
Konferensia V Sub-Nasional OPMT iha munisípiu tolu, respetivamente, Dili (PA Nain Feto no PA Cristo Rei), Viqueque (PA Lacluta) no Bobonaro (PA Atabae). Hatan ba Rejimentu ba V Konferensia Sub-Nasional OPMT, kada estrutura Postu Admnistrativu no Sub-Rejiaun harii Komisaun Organizadora no ekipa sira atu tuun rasik buka delegada rua, ida ho idade menus 35 no ida seluk liu 35.
KPA Nain Feto halibur konferensistas 97 nuudar delegadas dezignadas hamutuk 76 husi aldeia 38 no delegadas dezignadas 12 husi suku 6. Delegada sira nee mai par-par husi kada aldeia no kada suku, ho idade menus no liu 35. Hamutuk ho eis-responsaveis rua no nain hitu husi estrutura Postu Administrativu sei eleje estrutura OPMT ba Postu Administrativu Nain Feto, ho membru nain sia, inklui suplente 2.
Iha Domingu, KPA Cristo Rei halibur konferensistas 127 nuudar delegadas dezignadas hamutuk 102 husi aldeia 51 no delegadas dezignadas 16 husi suku 8. Delegada sira nee mai par-par husi kada aldeia no kada suku, ho idade menus no liu 35. Hamutuk ho eis-responsaveis rua no membru efetivu nain hitu husi estrutura Postu Administrativu sei eleje estrutura OPMT ba Postu Administrativu Nain Feto, ho membru nain sia, inklui suplente 2.
Nunee mos iha KPA Lacluta sei halibur konferensistas 57 nuudar delegadas dezignadas hamutuk 40 husi aldeia 40 no delegadas dezignadas 8 husi suku 4. Delegada sira nee mai par-par husi kada aldeia no kada suku, ho idade menus no liu 35. Hamutuk ho eis-responsaveis rua no membru efetivu nain hitu husi estrutura Postu Administrativu sei eleje estrutura OPMT ba Postu Administrativu Nain Feto, ho membru nain sia, inklui suplente 2.
Nomos KPA Atabae sei halibur konferensistas 57 nuudar delegadas dezignadas hamutuk 40 husi aldeia 20 no delegadas dezignadas 8 husi suku 4. Delegada sira nee mai par-par husi kada aldeia no kada suku, ho idade menus no liu 35. Hamutuk ho eis-responsaveis rua no membru efetivu nain hitu husi estrutura Postu Administrativu sei eleje estrutura OPMT ba Postu Administrativu Nain Feto, ho membru nain sia, inklui suplente 2.
Konferensista sira sei eleje mos delegadas par-par ba Konferensia Munisipal OPMT tuir kuota atribui ona ba kada Postu Admnistrativu no mos delegadas nain lima (5) ba Konferensia Munisipal partidu FRETILIN.
Aleinde nee OPMT Oecusse prepara ba V Konferensia Sub-Rejiaun Hatuir orientasaun husi Sekretariadu Nasional OPMT no Rejimentu ba V Konferensia Sub-Nasional OPMT, membru OPMT sira husi estrutura rejional sira, dezignadamente, Konsellu Koordenador, Komisaun Fiskalizasaun no Komisaun Jurisdisaun halibur ohin, iha salaun Noelico, PA Pante Macassar ho membru sira husi Konsellu Koordenador husi Sub-Rejiaun ida-idak no membru sira halo parte Komisaun Organizadora Sub-Rejiaun.
Reuniaun konsolidasaun Rejiaun Oecuse konta ho partisipasaun husi Koordenadora munisipal OPMT no membru CCF, Sancia Florência Paixão Bano, neebe halao hela knaar nuudar deputada FRETILIN ba mandatu 2026-2031.
Nuudar parte faze preparasaun ba V Konferensia Sub-Nasional OPMT, ba husi Dili, Adjunta Sekretaria-Jeral, Luisa da Costa no membru rua husi Konsellu Koordenador Nasional, respetivamente, Luisa Bano no Abelina da Costa Pereira.
estrutura sub-rejiaun no rejiaun Oecusse haree ho ekipa nasional OPMT oinsa implementa Rejimentu aprova husi Konsellu Koordenador Nasional no Diretiva sira hatun husi Sekretariadu Nasional OPMT atu Konferensia Sub-Nasional hothotu lao tuir regras no hetan susesu.
Estrutura iha kada sub-rejiaun sei kontinua halo levantamentu espesífiku hodi kompleta lista par-par delegadas husi kada aldeia no kada suku, ida ho idade menus 35 no ida seluk ho idade liu 35, tuir kuota determina ona iha Rejimentu ba V Konferensia Sub-Nasional OPMT.
Konferensia kada Sub-Rejiaun Oecuse sei halao iha tempu badak bainhira lista inskrisaun delegadas dezignadas par-par husi kada aldeia no kada suku kompleta ona, atu kada orgaun – Konsellu Koordenador sub-rejiaun OPMT, bele hatuur mos ho Buiberes FRETILIN, ho idade menus 35, pelu menus, 30% husi total, tuir Estatutus haruka.
Hamutuk hotu estrutura sira husi Sub-Rejiaun sira, dezignadamente, Nitibe, Oesilo, Pante Macassar no Pasabe hamutuk hotu sei mobiliza Buiberes 126 atu tuir V Konferensia Sub-Nasional sira iha rejiaun Oecuse, tuir ida-idak ninia kuota.
Kada Sub-Rejiaun sei eleje delegadas ba Konferensia Munisipal OPMT no Konferensia Munisipal FRETILIN.
Partisipa iha sesaun abertura reuniaun konsolidasaun, kuadru husi orgaun sentral sira husi partidu FRETILIN, dezignadamente, membru CPN, Arsenio Bano, membru Fiskalizasaun Nasional, Madalena Boavida, membru CCF, Gervasio da Silva no mos husi organizasaun massas JF, Sekretariu Ezekutivu, Benjamin Cau.
(eme)
