DILI, STLTIMORLESTE.com – Prezidente Republika (PR), Jose Ramos Horta too ona iha Port Moresby, ba Vizita Estadu Istorika oinsa hametin relasaun bilateral rai rua.
Prezidente Republika Jose Ramos Horta too ona iha Aeroportu Internasional Jacksons iha dadeer nee hosi Singapura, hodi marka inísiu ba ninia Vizita Estadu dahuluk iha Papua-Nova Guine.
Bainhira tun husi aviaun Prezidente Ramos Horta simu ho protokolu formal nuudar Xefe Estadu neebe komesa misaun loron haat nian hodi hametin ligasaun bilateral no haforsa kooperasaun estratejika entre nasaun Melanezia rua nee.
Vizita nee koinside ho Simeira Inaugural Oseanu Melanezia nian, iha neebe Prezidente Ramos Horta sei hamutuk ho Primeiru Ministru James Marape no lider rejional sira seluk iha APEC Haus. Programa ofisial nee inklui vizita kortezia ba Governador Jeral, Sir Bob Bofeng Dadae, no reuniaun bilateral nivel aas neebe foka ba governansa oseanu, reziliensia ekonomika, no diplomasia rejional.
Durante simeira nee, hein katak Timor-Leste sei hamutuk ho vizinu Pasífiku sira hodi promete apoiu ba meta biodiversidade global 30×30. Hodi foti importansia hosi viajen nee. Prezidente Ramos-Horta enfatiza katak Timor-Leste hamriik ho solidariedade hamutuk ho nasaun Melanezia sira hodi proteje sira-nia “eransa azul” no garante moris-diak ba jerasaun foun sira.
(eme)
